Меѓународна полициска акција, спроведена од српското Министерство за внатрешни работи (УКП и СБПОК) во координација со обвинителствата во Белград и Виена, резултираше со разбивање на организирана криминална група која со години се занимавала со производство и дистрибуција на марихуана низ Европа.

Апсењата се извршени истовремено во Србија, Австрија и Шпанија. На територијата на Белград и Бор е уапсен осомничениот организатор А.П. (39) од Белград, заедно со членовите М.Ѓ. (49) и Б.С. (35) од Бор. Коорганизаторот Д.С. (45) е приведен во Шпанија, на аеродромот во Мадрид.

Во Австрија, полицијата уапси уште четворица членови на групата, сите од Бор: С.М. (40), С.С. (52), Б.Р. (51) и М.Т. (35).

При претресите во Виена биле откриени три целосно опремени лаборатории за одгледување марихуана во вештачки услови, со илјадници растенија во различни фази на раст. Запленети се и 75 килограми сува марихуана подготвена за продажба, како и поголема сума пари, скапи часовници и луксузни возила.

Според истрагата, А.П. и Д.С. раководеле со криминалната мрежа која дистрибуирала марихуана на пазарите во Србија, Австрија и Северна Македонија. Пониско рангирани членови биле испраќани во Австрија, каде што со логистичка поддршка од М.Ѓ. и Б.С. биле изнајмувани објекти и воспоставувани лаборатории, а новите членови биле обучувани за одгледување на дрогата.

Осомничените уапсени во Србија се задржани до 48 часа и ќе бидат изведени пред Вишото јавно обвинителство во Белград, со кривични пријави за неовластено производство и ставање во промет на наркотични дроги.

Протестите на грчките земјоделци, кои од 30 ноември блокираа автопатишта низ целата земја, предизвикаа драстичен пад на туристичките резервации во планинските зимски дестинации. Според хотелиерите, откажувањата достигнаа и до 50 проценти, а загубите не се ограничени само на Божиќ и Нова година, туку траат речиси еден месец.

„Не зборуваме за еден или два продолжени викенда. За 25 дена изгубивме половина од резервациите. Ако пред празниците се надевавме на полна зафатеност, сега максимално достигнуваме 50 проценти исполнетост“, вели Јоргос Зафирис, претседател на хотелиерите од Магнисија. Во Јанина, откажувањата изнесуваат меѓу 20 и 25 проценти, а во Трикала, каде се наоѓа популарниот „Мелницата на џуџињата на Дедо Мраз“, првично 100-процентната зафатеност се намали на 60 проценти.

Претседателот на федерацијата на грчки хотелиери, Јанис Хаѕис, истакна дека причината не е кај клиентите, туку во блокадите, и повика на мерки за намалување на економската штета врз туристичкиот сектор. Федерацијата пред 12 дена испрати писмо до министерствата за транспорт, земјоделство и заштита на граѓаните, нагласувајќи дека протестите се разбираат, но дека тие не смеат да предизвикуваат несразмерни последици за локалните економии.

Иако земјоделците вчера ги тргнаа дел од блокадите, сообраќајот се очекува да се нормализира дури до петок, додека тракторите остануваат паркирани во една од коловозните ленти, симболично потсетувајќи дека протестите, и покрај делумното попуштање, сè уште оставуваат трага врз туристичкиот сектор.

Турските безбедносни сили приведоа 115 лица осомничени за поврзаност со терористичката организација Исламска држава, кои, според разузнавачки информации, подготвувале напади за време на Божиќните и новогодишните празници, соопшти Канцеларијата на главниот обвинител во Истанбул.

Според полицијата, планираните напади биле насочени кон немуслимански граѓани и фреквентни јавни локации низ Турција. Акцијата е резултат на повеќенеделна истрага и интензивно следење на осомничените мрежи.

Во рамки на операцијата, истанбулската полиција извршила рации на 124 локации. Од вкупно 137 идентификувани осомничени, приведени се 115 лица, додека по останатите се трага. При претресите биле пронајдени и запленети оружје и муниција.

Надлежните институции соопштија дека истрагата продолжува со цел целосно расветлување на случајот и идентификување на сите лица инволвирани во планирањето на нападите, нагласувајќи дека безбедноста на граѓаните за време на празниците останува врвен приоритет.