Балкан

Милановиќ: Хрватските војници нема да учествуваат во туѓи војни

Претседателот на Хрватска, Зоран Милановиќ, порача дека хрватските војници нема да бидат вклучени во војни на други држави. Изјавата следи еден ден по учеството на премиерот Андреј Пленковиќ на видеоконференција на лидерите на „Коалицијата на подготвените“, која се одржа два дена по средбата меѓу Владимир Путин и Доналд Трамп на Алјаска, а пред денешниот состанок на европските лидери со Трамп во Вашингтон.

Пленковиќ истакна дека Хрватска ја поддржува постапката за постигнување праведен и одржлив мир кој го почитува меѓународното право и територијалниот интегритет на Украина, со долгорочни безбедносни гаранции.

Милановиќ нагласи дека обврските на Хрватска произлегуваат исклучиво од членството во ЕУ и НАТО, а не од „политички или воени договори на лидерите на земјите од Коалицијата на подготвените“. Тој додаде дека владата нема овластување да ја вклучи Хрватска во нови коалиции што би значеле учество на хрватски војници во војната во Украина. „Добив мандат од хрватските граѓани да го застапувам овој став и затоа повторувам: хрватски војници нема да учествуваат во туѓи војни“, порача Милановиќ.

Балкан

Пијан возач фатен со 200 км/ч

Припадници на Министерството за внатрешни работи на Србија денес околу 14 часот го запреа Д.В. (39) во Лозница, кој управуваше возило „суди“ со брзина од 200,8 километри на час на дел од патот Лозница – Шабац, каде што ограничувањето е 100 км/ч.

Со алкотестирање е утврдено дека возачот бил во тешка алкохолна интоксикација, со 1,41 промили алкохол во крвта.

Возачот веднаш бил исклучен од сообраќај и задржан во службените простории, а против него е поднесена прекршочна пријава за насилно возење и возење под дејство на алкохол.

Балкан

Вучиќ: Србија има гориво до 15 јануари

Српскиот претседател Александар Вучиќ увери дека Србија има обезбедено доволно керозин, мазут, дизел и бензин најмалку до 15 јануари, а можеби и до 25 јануари, обидувајќи се да ги смири граѓаните по информациите за проблеми во нафтената индустрија.

Иако државата веќе 70 дена функционира без увоз на нафта, Вучиќ истакна дека енергетскиот систем е стабилен и дека нема причина за паника пред претстојните празници. Тој сепак призна дека ситуацијата е комплицирана, особено поради статусот на Нафтната Индустрија Србија (НИС), за што Белград следната недела ќе испрати итни барања до американската канцеларија за контрола на странски средства (ОФАК) за добивање оперативна лиценца.

„Доволно керозин, мазут, дизел и бензин обезбедивме најмалку до 15 јануари, можеби и до 25 јануари. Никој не треба да се грижи, имаме безброј технички проблеми, но државата знае како да ги реши“, рече Вучиќ.

Претседателот потенцираше дека Србија нема да дозволи колапс на енергетскиот сектор и им се заблагодари на граѓаните за поддршката. „Ве уверувам дека ќе имате доволно од сè што е потребно за празниците. Ќе добивате навремени информации за секоја промена“, додаде тој.

Балкан

Тешка несреќа на Дурмитор: Турист загина по пад од жичара, жена тешко повредена

Трагичен инцидент се случи денеска на ски-центарот Савин Кук на Дурмитор, кога две лица – странски туристи – паднале од корпа на ски-лифт, при што едно лице го загуби животот, а друго се здоби со тешки повреди.

Несреќата се случила на жичара број два, во стрмниот втор дел од трасата што води кон Савин Кук. Според првичните информации, загинал маж, додека повредената жена е во свесна состојба и комуникативна.

На терен се ангажирани спасувачки и надлежни служби, кои вршат увид и ја утврдуваат причината за инцидентот. Првичните сознанија укажуваат на можен технички дефект во вториот дел од жичарата, по што корпата во која се наоѓале туристите започнала да се движи наназад.