Скопје

Секторот за внатрешни работи Скопје за едно деноноќие расчисти три кривични дела и лиши од слобода тројца насилници од Скопје

Единицата за насилен криминал при СВР Скопје на 17.08.2025, во консултација со јавен обвинител, поднесе кривична пријава по брза постапка против Е.В. (28) за кривично дело „убиство во обид при вршење семејно насилство“ и таа е изнесена пред судија на претходна постапка, кој и одредил мерка притвор во траење од 30 дена. На 15.08.2025 во 14:00 часот во Скопје, на подрачјето на Ѓорче Петров, полициски службеници ја лишија од слобода Е.В. по претходна пријава дека во семејниот дом ја нападнала 87-годишната баба на нејзиниот сопруг. Од страна на судија на претходна постапка, на Е.В. и е одредена мерка притвор во траење од 30 дена.

Исто така, на 17.08.2025 Единицата за насилен криминал при СВР Скопје поднесе кривична пријава по брза постапка против П.А.(36) од Скопје за кривично дело „телесна повреда“ по чл.130 ст.2 од КЗ, затоа што на 15.08.2025 околу 16:00 часот во семејниот дом во скопско физички ја нападнал сопругата Н.А.. По преземени мерки од полициските службеници, П.А. е лишен од слобода, изведен е пред судија на претходна постапка, кој му определи мерка на претпазливост.

Единицата за насилен криминал при СВР Скопје го расчисти и случајот со физичката пресметка на 16.08.2025 околу 19:00 часот на ул.„Славеј планина“ во Скопје во која учествувале повеќе лица, биле употребени и тврди и остри предмети, при што со тешки телесни повреди се здобиле две лица, а уште неколку лица се здобиле со повреди. По пријавувањето на настанот, од страна на ЕНК при СВР Скопје преземени се опсежни мерки за откривање и документирање на настанот по што на 17.08.2025 до ОЈО Скопје поднесена е кривична пријава по брза постапка против С.Д. за кривично дело „убиство во обид“ по чл.123 во врска со чл.19 од КЗ, против А.А. и С.Д. за кривично дело „тешка телесна повреда“ по чл.131 од КЗ, а против други седум лица за кривично дело „учество во тепачка“ по чл.132 од КЗ. Лицата се изведени пред судија на претходна постапка, кој на С.Д. му изрекол мерка куќен притвор во траење од 30 дена, а на седум лица изречена им е мерка на претпазливост да не го напуштаат градот и секој понеделник да се јавуваат во суд.

Скопје

Тимот на Реал Мадрид поделен: Кој е за Винисиус, а кој за Алонсо

Во Реал Мадрид расте тензијата во соблекувалната, откако се откри дека дел од играчите ја поддржуваат новата политика на тренерот Чаби Алонсо, додека други се на страната на незадоволниот Винисиус Жуниор. Според шпанските медиуми, односите помеѓу тренерот и дел од фудбалерите се доведени до критична точка само шест месеци по неговото доаѓање на клупата.

Винисиус Жуниор, кој не сака да потпише нов договор додека Алонсо е на чело, го предводи таборот на незадоволните. Во оваа група се вбројуваат и Родриго, Федерико Валверде, Брахим Дијаз, Ендрик и Ферланд Менди. Од друга страна, Алонсо добива поддршка од Килијан Мбапе, Тибо Куртоа, Арда Гулер, Дин Хуијсен и Алваро Карерас.

Според извештаите, падот на формата на тимот дополнително ја заострува ситуацијата, а судирот помеѓу тренерот и клучниот напаѓач создава загриженост кај управата. Винисиус планира да отпатува во Саудиска Арабија во февруари 2026 година за преговори со локални клубови, што може да резултира со негов трансфер следното лето, иако тоа би го отстранило од борбата за „Златната топка“.

И покрај понудите од клубот за продолжување на договорот, Винисиус инсистира на минимално 30 милиони евра по сезона, додека Реал му нуди 20 милиони, што е значително повеќе од неговата сегашна плата. Иднината на Бразилецот и неговиот однос со Алонсо остануваат неизвесни, а вниманието на јавноста е насочено кон тоа како ќе реагира претседателот Флорентино Перез.

Скопје

„Зелен хуман град“ бара забрана за огномети во Скопје: Токсичните честички и бучавата сериозно го загрозуваат здравјето и безбедноста на луѓето и животните

Граѓанската иницијатива „Зелен хуман град“ предлага забрана за употреба на огномети во Скопје, потенцирајќи дека традиционалните прослави и забави со експлозивни материи со децении го загрозуваат здравјето на луѓето, животната средина и безбедноста на животните.

„Огнометите ослободуваат големи количини ПМ 2,5 и ПМ 10 честички, токсични гасови како CO, SO₂, NOx, како и тешки метали – бариум, бакар, стронциум и олово. Овие супстанции загадуваат воздух, вода и почва, а најранливите групи, како деца, бремени жени и лица со хронични респираторни или кардиоваскуларни заболувања, се директно погодени“, велат од иницијативата.

Тие предупредуваат дека огнометите предизвикуваат и сериозни психолошки реакции кај луѓето: анксиозност, панични напади, флешбекови кај лица со посттрауматски стрес, сензорни колапси кај луѓе со аутизам, како и ризик од епилептични напади кај лица со фотосензитивна епилепсија.

Последиците врз животните се исто така драматични. „Околу 70–75% од домашните миленици доживуваат силен страв, тресење, паника, обиди за бегство и повреди. Кај дивите животни се забележани масовни повреди, особено кај птиците, како и висок стрес, дезориентација и смрт“, додаваат од „Зелен хуман град“.

Иницијативата потсетува дека Законот за заштита од експлозивните материи веќе предвидува забрана за употреба на огномети без дозвола и стручно лице, но законот ретко се почитува на терен.

„Ги повикуваме сите советнички групи во Советот на Град Скопје да ја поддржат оваа иницијатива и да покажат дека здравјето на луѓето и животните, особено на најранливите жители на Скопје, е приоритет“, заклучуваат од „Зелен хуман град“.

Скопје

Виртуелно патување низ Кисела Вода – првата скопска општина со дигитална прошетка

Општина Кисела Вода влегува во новата дигитална ера, поставувајќи нов стандард за локална самоуправа.! Со лансирањето на спектакуларниот 360° виртуелен проект, наречен „Општина Кисела Вода НА ДЛАНКА – 360°“, таа стана првата скопска општина која доби ваква целосна, реална и интерактивна презентација.

Овој модерен дигитален потфат ја трансформира општината во достапен виртуелен простор. Граѓаните, учениците, но и сите посетители и туристи, сега имаат уникатна можност виртуелно да „прошетаат“ низ Кисела Вода, истражувајќи ги нејзините најзначајни точки – од образовни и културни центри, до спортски терени и духовни локации.

Со над 500 панорами снимени и од воздух и од земја, поврзани во беспрекорна интерактивна прошетка, корисниците добиваат реалистично искуство, комплетирано со сите релевантни информации за секоја локација.

Од Општината истакнуваат дека оваа иновативна алатка има далекусежни последици.

Проектот претставува едукативен пресврт. Учениците сега можат да ја користат виртуелната прошетка за полесно разбирање на содржините по историја, географија и други предмети – учењето никогаш не било поинтерактивно.

Од туристички аспект, „Кисела Вода НА ДЛАНКА“ е моќна промотивна алатка. Потенцијалните посетители сега можат однапред да ја истражат целосната понуда на општината, што создава силен потенцијал за привлекување нови туристи.

Со овој проект, Кисела Вода ја докажува својата посветеност кон иновациите и транспарентноста, ставајќи го секое ќоше од општината буквално во рацете на своите жители и гости.

Видеото може да го погледнете на: Facebook