140 ученици од основните училишта во општина Кисела Вода денес заминаа на седумдневно бесплатно летување во одморалиштето „Детски радости“ во Свети Стефан, Охрид.
За нивната безбедност и квалитетно поминато време ќе се грижат наставници, аниматори, рекреатори и доктор кој ќе внимава на нивното здравје.
Станува збор за проект на Општина Кисела Вода наменет за деца од социјално ранливи категории – ученици од семејства кои примаат социјална помош, еднородителски семејства или семејства со ниски приходи.
„Со оваа мерка им овозможуваме еднакви можности и радости какви што имаат и нивните врсници“, истакна градоначалникот Орце Ѓорѓиевски.
Покрај летувањето, за новата учебна година Општината обезбеди бесплатни ранчиња и училишен прибор за сите првачиња, униформи за сите основци, како и продолжување на проектот за бесплатни часови по странски јазици, компјутерска технологија и спорт.
„Продолжуваме со искрен ангажман за успешен развој на најмладите и континуирано подобрување на нивното секојдневие“, додаде Ѓорѓиевски.
