Албанија би можела да стане првата земја во Европа што ќе воведе „министерства водени од вештачка интелигенција“, најави премиерот Еди Рама. На прес-конференција тој изјави дека е можно еден ден цело министерство да функционира без човечки фактор, управувано исклучиво од алгоритми.
„Вештачката интелигенција не познава непотизам, не прави грешки, не бара плата и не може да биде корумпирана. Затоа мора да ја искористиме за да ја модернизираме државата“, рече Рама, додавајќи дека оваа технологија може да стане најефикасниот член на албанската влада.
Премиерот ја истакна и борбата против корупцијата како клучна причина за ваквата идеја. Локалните програмери веќе работат на модели на вештачка интелигенција кои би можеле да ја преземат улогата на министри, а Рама тврди дека таквиот потег може да ја забрза интеграцијата на Албанија во ЕУ.
Поранешниот политичар Бен Блуши го поддржа концептот, велејќи дека „општествата ќе бидат подобро водени од вештачка интелигенција, бидејќи таа не може да биде корумпирана“. Но, опозициската пратеничка Јорида Табаку предупреди дека технологијата може да стане само „дигитална маска за истите стари проблеми“, доколку зад алгоритмите стојат истите актери кои профитирале од корупција.
Во моментов, Албанија веќе користи вештачка интелигенција за следење на јавни набавки, анализа на даночни и царински трансакции во реално време, како и за надзор со дронови и сателитски системи против нелегална градба и канабис плантажи. Планирана е и примена во здравството, образованието и дигиталната идентификација на граѓаните.
Рама најави дека идејата ќе се разгледува на пошироко ниво, а според него, доколку проектот успее, Албанија може да стане првата земја со целосна „дигитална влада“.
