Картата на Украина што беше изложена во Овалната сала на Белата куќа за време на посетата на украинскиот претседател Володимир Зеленски, според портпаролката на руското МНР, Марија Захарова, претставува „шамар кој требаше да го врати во реалност“.
Во изјава за радиото „Спутник“, Захарова рече дека картата била „силен симболичен удар“ за сите кои, како што нагласи, „со години живеат одвоени од историјата, географијата и реалноста, повторувајќи приказни за фронтови без да сфаќаат што всушност зборуваат“.
– Тој шамар требаше на некој магичен начин да го разбуди Зеленски. Можеби нема лесно да се врати целосно во разум, но барем да се протресе и да сфати – и тој, и оние што стојат зад него – колку изгубиле и колку прокоцкале – изјави Захарова.
Британскиот „Би-би-си“ претходно забележа дека картата што ја објави Доналд Трамп носи јасна политичка порака. На неа, околу 20 проценти од украинската територија биле означени со розова боја. Според медиумот, тоа претставува „ладен потсетник за Украинците во просторијата за моменталната состојба по речиси четири години војна“.
„Би-би-си“ додаде дека изложувањето токму на таква карта било „јасен сигнал“ од страна на Трамп за засилување на притисокот врз Зеленски со цел да прифати идеја за размена на територии за мир.
