Стравична сцена се одигра во селото Имеровигли на Санторини, еден од најпознатите грчки острови, кога голем одрон од земја и карпи се сруши право во морето, покривајќи ја целата област со облак прашина.
Настанот предизвика паника меѓу туристите и локалното население, потсетувајќи на опасноста од можен разорен земјотрес – особено по серијата потреси кои последниве месеци го зафатија овој дел од Грција, пренесе порталот Protothema.
На видеоснимките забележани од жителите се гледаат драматичните моменти на уривање и густите облаци што за неколку секунди ја прекрија околината, додека очевидците со ужас ја следеа стихиската појава.
Стручњаците предупредуваат дека погодениот дел од островот и претходно бил означен како зона со висок ризик, поради интензивната градежна активност која дополнително ја оптоварила веќе кревката геолошка структура. Изградбата на нов објект во непосредна близина, велат тие, ја забрзала појавата на одронот.
„Санторини има исклучително ранлива геоморфологија, а прекумерната градба го зголемува ризикот од клизишта“, нагласуваат експертите, апелирајќи за итни мерки – ограничување на градежните активности и воведување построги контроли со цел заштита на населението и природната средина.
Островот веќе подолго време е изложен на силен туристички притисок, а неговата кревка рамнотежа ја загрозува и постојаната сеизмичка активност. Минатата зима дел од жителите беа принудени привремено да ги напуштат своите домови поради страв од голем земјотрес – потсетник за тоа колку е чувствителна безбедноста на овој светски познат туристички рај.
