Високи воени заповедници од САД и повеќе европски земји изработиле воени опции за Украина кои ќе им бидат презентирани на советниците за национална безбедност, соопшти американската армија.
Состаноците се одржаа во Вашингтон од вторник, а на нив учествуваа генерали од САД, Финска, Франција, Германија, Италија, Велика Британија и Украина. Главна тема биле поратните безбедносни гаранции за Украина, откако претседателот Доналд Трамп најави дека ќе помогне во заштитата на земјата во рамки на можен мировен договор со Русија.
Една од опциите што протекоа во јавност е распоредување европски војници на украинска територија, но под команда на САД. Иако Трамп јавно ја исклучи можноста за испраќање американски војници, тој остави простор за „други форми на воен ангажман“, како што се воздушна поддршка, испорака на противвоздушни системи или воспоставување зона забранета за летање.
Францускиот претседател Емануел Макрон и британскиот премиер Киер Стармер веќе се изјаснија дека поддржуваат распоредување војници во рамки на „коалиција на подготвените“, а германскиот канцелар Фридрих Мерц исто така најави подготвеност за учество.
Од Москва, Министерството за надворешни работи категорично ја отфрли можноста мировниот договор да го обезбедуваат сили од земји членки на НАТО, нарекувајќи ја идејата „провокативна и неприфатлива“.
Според дипломатски извори, иако Украина и европските сојузници позитивно го пречекаа ветувањето на Трамп, до конечна формула што ќе биде и воено издржана и прифатлива за Русија ќе треба многу време и преговори.
