Македонија

Мицкоски ја затвори дилемата: Бадентеровото мнозинство останува, темата е завршена

Изјавата на министерот за правда Игор Филков, дека „можеби е дојдено време да се ревидира Бадентеровото мнозинство“, предизвика силни реакции во јавноста. Премиерот Христијан Мицкоски брзо одговори, нагласувајќи дека ова прашање е затворено и не смее да биде предмет на ревизија.

Филков, во интервју за „Фокус“ објавено денеска, рече дека доколку Бадентеровото мнозинство се злоупотребува, тогаш треба да се размисли за негова промена. Но, Мицкоски на новинарско прашање изјави дека тоа е дел од Охридскиот рамковен договор и како такво е дел од Уставот.

„Рамковниот договор е исполнет во целост и тоа е завршена тема. Она што е институционален проблем – балансерот што беше укинат од Уставниот суд – ќе се решава со нов Закон за правична застапеност, кој покрај етничката ќе предвиди и критериум за квалитет и компетенции. Законот е испратен во Венецијанската комисија и очекуваме мислење пред да оди на гласање“, изјави премиерот.

ДУИ веднаш реагираше преку својот портпарол Арбер Адеми, кој оцени дека предлозите на Филков се опасни и водат кон нарушување на меѓуетничките односи. „Оваа Влада систематски го напаѓа Охридскиот договор – со укинување на балансерот, со непочитување на правичната застапеност и албанскиот јазик“, рече Адеми.

Третиот коалициски партнер во Владата, албанската коалиција „Вреди“, засега нема официјален став.

За евентуална промена на Бадентеровото мнозинство би била потребна уставна интервенција и двотретинско мнозинство во Собранието – политичка мисија која во моментов е невозможна.

Македонија

Згасна позната телевизија во Македонија – престана да емитува програма

Македонскиот телевизиски етер остана посиромашен за еден канал. Телевизија Сонце, која години наназад емитуваше програма со национална концесија преку кабелските оператори, престана со работа.

Гледачите кои се обидуваат да го најдат каналот сведочат за „црн екран“ или известување дека нема сигнал.

ТВ Сонце беше препознатлива по својата специфична програмска шема, фокусирана на македонската историја, културното наследство и прашањата поврзани со македонската дијаспора. Телевизијата беше основана од бизнисменот Ѓорѓија – Џорџ Атанасоски.

Останува непозната и судбината на вработените во овој медиум.

Македонија

Македонија и Турција ја зајакнуваат соработката во образованието и науката со нов договор

Македонија и Турција отвораат ново поглавје во билатералната соработка во образованието, науката, технологијата и иновациите. Министрите за образование и наука, Весна Јаневска и Јусуф Текин, потпишаа договор со кој се зајакнува партнерството меѓу двете земји и се создава основа за интензивна размена на знаење, искуства и кадар.

Со договорот се предвидува размена на информации и научни публикации во областа на формалното и неформалното образование, како и поттикнување на мобилноста на академици, образовни експерти, наставници и средношколци. Посебен акцент е ставен на средното, особено стручното образование, обуката и квалификациите на наставниот кадар, доживотното учење и реализацијата на заеднички образовни проекти.

Двете држави ќе разменуваат искуства и во примената на нови образовни технологии, како и во подготовката и унапредувањето на наставните планови и програми. Учениците ќе добијат можност да учествуваат на научни и културни натпревари што се организираат во Македонија и Турција, а ќе се поттикнува и развојот на заеднички образовни програми и збратимување на училишта.

Како дел од договорената соработка, во двете земји ќе се воведат изборни предмети „Јазикот и културата на Турците“, односно „Јазикот и културата на Македонците“, а предвидено е и меѓусебно стипендирање на средношколци.

За ефикасна примена на договорот ќе биде формирана заедничка работна група, која ќе го следи и координира спроведувањето на договорените активности.

Македонија

Неработни денови и продолжени викенди во јануари 2026

Празничната атмосфера продолжува и во првиот месец од новата година, а јануари носи неколку неработни денови кои овозможуваат подолг одмор и полесно планирање на работните обврски.

Новата година започнува со 1 јануари, кој е неработен ден и паѓа во четврток. Веќе во петок, на 2 јануари, следи кратко враќање на работа, по што доаѓа викенд пауза. Понеделник, 5 јануари, е работен ден, а потоа следуваат 6 и 7 јануари, кога се празнуваат Бадник и Божиќ, кои се неработни денови. На работа повторно се враќа на 8 јануари.

Јануари не завршува тука со празниците. На 19 јануари, понеделник, се празнува Богојавление – Водици, кој е неработен ден за граѓаните од православна вероисповед.

Дополнително, за припадниците на српската заедница, неработен ден е и 27 јануари, кога се одбележува празникот Свети Сава.

Со ваквиот распоред, јануари нуди неколку можности за продолжени викенди и кратки одмори, што многумина веќе ги користат за планирање на слободното време.