Унгарија и понатаму е подготвена да биде домаќин на мировни преговори меѓу Русија и Украина, изјави министерот за надворешни работи Петер Сијарто во подкаст емитуван на Фејсбук.
Сијарто потсети дека Будимпешта веќе двапати ја понудила оваа можност и нагласи дека понудата сè уште е валидна. Неговата изјава доаѓа по извештаите на „Политико“ дека Белата куќа ја разгледува унгарската престолнина како локација за можна трилатерална средба меѓу американскиот претседател Доналд Трамп, рускиот претседател Владимир Путин и украинскиот претседател Володимир Зеленски.
Според извештаите, американската тајна служба веќе се подготвува за можен самит во Унгарија, при што Будимпешта се наметнува како прв избор на Вашингтон.
„Доколку им требаме, ние сме подготвени да обезбедиме фер и безбедни услови за мировни разговори. Среќни сме ако можеме да придонесеме за успехот на напорите за мир“, изјави Сијарто.
