Декласифицирани документи открија: Клинтон му нудел членство во НАТО на Путин
Декласифицирани документи, објавени од истражувачката организација National Security Archive при Универзитетот „Џорџ Вашингтон“, откриваат дека поранешниот американски претседател Бил Клинтон во 2000 година му порачал на рускиот лидер Владимир Путин дека проширувањето на НАТО не претставува закана за Москва и дека е подготвен да ја разгледа можноста за членство на Русија во Алијансата.
„Од самиот почеток знаев дека проширувањето на НАТО може да биде проблем за Русија. Бев чувствителен на тоа и сакам да биде јасно дека тоа не е закана за Москва“, се наведува во белешката од разговорот на 4 јуни 2000 година во Кремљ, составена од Белата куќа.
Клинтон му порачал на Путин: „Сериозен сум кога велам дека сум подготвен да разговарам за руско членство во НАТО. Разбирам дека моменталните околности во Русија тоа не дозволуваат, но со време, Русија би требало да стане дел од секоја организација што го обединува цивилизираниот свет. Ако нашите наследници гледаат еден на друг како на главни закани, ќе ја пропуштат шансата да решаваат пошироки проблеми заедно.“
Тој додал дека е задоволен од обновата на соработката меѓу Русија и НАТО и дека односите повторно се вратиле во нормала.
Во февруари 2024 година, Путин во интервју со Такер Карлсон изјави дека Русија можела да стане членка на НАТО доколку САД на почетокот на 2000-те покажале искрена подготвеност.
Рускиот претседател се потсети на средбата со Клинтон: „Го прашав – ‘Бил, што мислиш, ако Русија отвори прашање за пристапување во НАТО, дали тоа би било можно?’ Тој ми рече: ‘Знаеш, интересно е, мислам дека би можело.’ Но, истата вечер на вечера ми кажа: ‘Разговарав со мојот тим – тоа сега не е возможно’.“
„Да кажеше ‘да’, процесот ќе започнеше и пристапувањето можеше да стане реалност, доколку постоеше искрена желба од нашите партнери“, изјави Путин, додавајќи дека Клинтон може да ја потврди оваа конверзација. „Никогаш не би изјавил нешто што не се случило,“ нагласи рускиот лидер.
