Социјалдемократскиот сојуз на Македонија е подготвен да излезе на предвремени парламентарни избори доколку таква можност се отвори по локалните избори во октомври, изјави потпретседателката на партијата Кристина Костова во интервју за емисијата „Вести плус“ на ТВ Канал 5.
„За предвремени парламентарни избори зборуваме подолго време. Потребата за нив се наметнува природно поради лошите политики на актуелната владејачка коалиција предводена од ВМРО-ДПМНЕ. Ние сме во полн капацитет да го изнесеме и тоа“, рече Костова.
Таа посочи дека додека СДСМ бил на власт, се одржале два редовни парламентарни изборни циклуси, бидејќи партијата не бегала од одговорност да се соочи со граѓаните за еден цел мандат. Според неа, ВМРО-ДПМНЕ во минатото постојано бегало од волјата на граѓаните со трчање кон предвремени избори.
Говорејќи за актуелната состојба, Костова нагласи дека државата се движи во погрешна насока под водство на премиерот Христијан Мицкоски, а граѓаните тоа го препознаваат. „Оттаму и како природна се наметнува потребата од предвремени избори. Ние сме подготвени“, истакна таа.
Во врска со надворешната политика, Костова оцени дека владата доживеала „комплетен дипломатски крах“, а Министерството за надворешни работи се користи како „министерство за туризам“. Таа ја критикуваше актуелната власт за тоа што не издејствувала подобра Преговарачка рамка со ЕУ и не постигнала напредок во евроинтеграциите.
За прашањето со Бугарија, Костова рече дека деблокада на преговорите е можно да се постигне, но само со јасна политичка волја. Таа предупреди дека нарушените позиции на земјата можат да бидат неповратни, како што тоа се случило со спорот со Грција, и додаде дека отворањето на поглавјата со ЕУ ќе значи реформи, подобрување на институциите и пристап до фондови.
„Она што Македонија треба да го направи е да ги отвори поглавјата и да започне со реформите. Наместо тоа, гледаме флоскули, празноговор, популизам и лажен патриотизам, кој веќе не поминува кај граѓаните“, рече Костова.
