Се појавија таинствени пораки во европските градови со слоганот „Русија не е мој непријател“, што предизвика сомнежи дека станува збор за нова пропагандна кампања на Кремљ. Последниот таков случај е регистриран во Романија, каде на јавни места биле поставени налепници со цел да ја прикажат Русија како „миротворец“, објави Kyiv Post.
На ова предупреди украинскиот Центар за борба против дезинформации при Советот за национална безбедност и одбрана, посочувајќи дека налепници со истата порака се појавиле и во повеќе градови во Франција и Италија, најчесто преку делување на проруски организации.
„Русија ја започна пропагандната акција ‘Русија не е мој непријател’, која веќе стигна до Романија. Налепниците што се појавуваат низ европските метрополи се дел од хибридна кампања со цел создавање илузија за ‘мирно партнерство’. Преку вакви алатки за влијание, Москва се обидува да се претстави како миротворец, да ги релативизира сопствените злосторства и да внесе поделби во европските општества“, се наведува во соопштението на Центарот.
Како дополнителна цел, кампањата има за задача да го поткопа довербата на граѓаните во владеењето на правото и во демократските институции, да ја доведе во прашање евроатлантската ориентација на државите и да ја дискредитира поддршката што Европа ѝ ја обезбедува на Украина.
Од Центарот потсетуваат и дека од почетокот на целосната инвазија врз Украина, Русија значително ги засилила хибридните напади врз критичната инфраструктура на Европската Унија.
