Свет

Зеленски: Путин разбира само сила, неопходен е зголемен притисок врз Русија

Украинскиот претседател Володимир Зеленски во синоќешното обраќање порача дека за да се стави крај на војната мора да се изврши силен притисок врз Русија, бидејќи, како што рече, Владимир Путин не разбира ништо друго освен сила.

„Оваа војна мора да биде приведена до крај. Путин не разбира ништо освен сила и притисок“, изјави Зеленски, додавајќи дека Украина паралелно продолжува со дипломатските напори и контакти со партнерите за да се одржуваат преговори кои можат реално да го доближат мирот.

Изјавата следи по коментарот на американскиот претседател Доналд Трамп, кој претходно рече дека е многу тешко, ако не и невозможно, да се добие војна без директен напад на земјата агресор. Зеленски се согласи со него, нагласувајќи дека само одбраната не е доволна.

Украинскиот лидер истакна дека советниците за национална безбедност, војската и Генералштабот работат на контурите на идната безбедносна архитектура на Украина – од оружје и воена соработка со партнерите, до сили на копно, море и воздух. Тој најави дека секојдневно ќе има нови дипломатски чекори и поддршка од сојузниците.

Во меѓувреме, Украина беше погодена од еден од најголемите воздушни напади досега. Според украинските воздухопловни сили, Русија лансирала околу 574 беспилотни летала и 40 ракети кон западните региони на земјата. Во нападот загина едно лице, а 15 се повредени.

Ова се случи само неколку дена откако рускиот претседател Владимир Путин беше во Алјаска на средба со американскиот претседател Доналд Трамп, каде ги презентираше своите услови за мир – вклучително и повлекување на Украина од Донецк.

Според „Ројтерс“, Путин повторил дел од претходниот предлог од 2024 година, со кој бара Киев да се откаже од Донецк, Луганск, Херсон и Запорожје. За возврат, Москва би задржала контрола врз своите тековни позиции во Херсон и Запорожје, а на Украина би ѝ вратиле делови од Харков, Сума и Днепропетровск.

Зеленски, сепак, нагласи дека Москва не покажува вистинска подготвеност за мир и ги повика сојузниците да воведат нови санкции и царини како дел од засилениот притисок врз Русија.

Свет

Германија воведува задолжителна воена обврска, казни до 1.000 евра за непослушните

Од јануари 2026 година, Германија официјално ќе започне со примена на нов модел на задолжителна воена обврска, со кој се предвидуваат и строги санкции за оние што ќе ја игнорираат процедурата. Сите мажи од одредена возрасна група ќе добиваат прашалници од Бундесвер, а одбивањето да се одговори или доставувањето неточни податоци ќе биде санкционирано.

Германското Министерство за одбрана соопшти дека процесот ќе започне со испраќање на околу 54.000 прашалници месечно. Според новите правила, непочитувањето на оваа обврска може да резултира со парична казна до 1.000 евра, па дури и со принудна регрутација.

Планот, кој го иницира министерот за одбрана Борис Писториус, предвидува постепено зајакнување на армиските капацитети. Од јули 2027 година, задолжителен ќе стане и лекарскиот преглед за сите мажи, а непојавувањето на прегледот може да доведе и до полициско приведување.

Целта на новиот модел е до 2035 година бројот на припадници на германската армија да достигне 270.000 војници, како дел од пошироките напори за јакнење на одбранбените капацитети на земјата.

Свет

Русија изврши еден од најжестоките напади врз Украина пред Божиќ

Повеќе од 600 беспилотни летала и околу 30 проектили ја погодија украинската престолнина Киев и енергетската инфраструктура низ земјата, при што загинаа најмалку три лица, меѓу кои и дете. Станува збор за еден од најмасовните руски напади во последните месеци.

Украинскиот претседател Володимир Зеленски изјави дека нападите извршени непосредно пред Божиќ јасно покажуваат кои се приоритетите на Москва. Тој предупреди дека Русија подготвува нов бран удари по празниците, оценувајќи дека таквото однесување е „нормално за Русија“. Според него, ситуацијата дополнително се усложнува поради недостигот од системи за воздушна одбрана.

Воздушната тревога била активна во речиси цела Украина, а Министерството за енергетика воведе вонредни рестрикции во неколку региони. Во Киев, делови од градот останале без електрична енергија поради погодената инфраструктура.

Полска соопшти дека подигнала борбени авиони за заштита на својот воздушен простор, поради зголемените безбедносни ризици во регионот.

Украина Божиќ го слави на 25 декември според новиот календар, иако дел од населението сè уште го одбележува празникот и на 7 јануари, како и во Русија.

Во вечерното обраќање, Зеленски најави враќање на украинската делегација од Мајами, каде што се одржале мировни разговори со американскиот специјален претставник Стив Виткоф. Разговорите ги оцени како конструктивни, но без конкретен напредок.

Во меѓувреме, украинските сили извршиле напад врз голема нафтена постројка во Ставропол, управувана од рускиот енергетски гигант Лукоил.

Свет

Зеленски предупредува: Русија подготвува масивни напади по Божик

Претседателот на Украина, Володимир Зеленски, предупреди дека Русија би можела да започне интензивни напади за време на Божиќ. Во обраќање пред дипломатите во Киев, тој оцени дека е „сосема нормално“ Кремљ да се обиде да изврши масивни напади токму за празникот, нагласувајќи дека Украина се соочува со тешка ситуација поради недостиг на системи за воздушна одбрана.

Иако Украина официјално го слави Божиќ на 25 декември, многу граѓани го почитуваат православниот календар и го слават празникот на 7 јануари, исто како и во Русија.

Зеленски исто така објави дека украинската делегација, која учествуваше на преговори во Мајами со американскиот специјален претставник Стив Виткоф, се очекува денеска да се врати во Украина. Виткоф оцени дека разговорите со украинската и руската делегација биле „конструктивни“, без да навлезе во детали за постигнати договори.