Битола на врвот по број на проекти, Коњановски најавува нов лик на градот

На денешниот настан „Саем-Отчет – 4 години работа за тебе“, градоначалникот на општина Битола, Тони Коњановски, истакна дека Битола не е повеќе „слепо црево“ како во минатото, туку град кој забрзано се развива и добива нова инфраструктура.

Коњановски нагласи дека се гради влезот на Битола со комплетна инфраструктура, пешачки и велосипедски патеки, како и нова обиколница во индустрискиот дел, улицата „Бурса“. „Битола во изминативе четири години е едно огромно градилиште. Влезот во градот го правиме со современо булеварско решение, првата третина од булеварот е веќе при завршување, со сите стандарди“, рече Коњановски.

Тој додаде дека со вториот повик за аплицирање, Битола е лидер со 65 проекти, кои ќе ја менуваат структурата на градот и ќе му дадат нов лик. „Со овие проекти ја менуваме водоводната инфраструктура, преку 50 километри улици се обновени во последните четири години, а градежниот бум е присутен во целата општина“, истакна Коњановски.

Градоначалникот ја потенцираше и финансиската поддршка од Владата преку унгарскиот кредит, што овозможило реализација на бројни проекти и дополнително забрзување на развојот на Битола.