Германија подготвува нови законски измени со кои ќе се отежни пристапот до работни дозволи за странските државјани, меѓу кои и македонските граѓани.
Според најавите, квотата за поедноставено вработување на лица од Западен Балкан ќе се преполови – наместо досегашните 50.000 дозволи годишно, ќе се издаваат значително помалку. Истовремено, новите правила предвидуваат дополнителни пречки за нелегалното вработување, особено во сектори како фризерството и козметичките услуги.
Дополнителен удар за странските работници е најавата дека брошурите за информирање околу социјалната помош ќе се печатат исклучиво на германски јазик. Досега тие беа достапни на повеќе јазици, меѓу кои англиски, руски, турски и романски.
Законот за борба против нелегалната работа и перењето пари, кој наскоро треба да се изгласа во Бундестагот, ќе воведе нова обврска – секој работник мора постојано да носи документ за идентификација, кој ќе мора да го покаже при инспекција.
Иако властите тврдат дека измените се насочени кон регулирање на пазарот на труд и спречување злоупотреби, германските компании предупредуваат дека ова ќе ја намали достапноста на работна сила, особено во градежништвото, угостителството, логистиката и транспортот. Според податоците, речиси половина од досегашните визи за Балканот биле издадени за градежниот сектор.
