Мицкоски: Нема враќање на ДУИ во владата по локалните избори

Претседателот на ВМРО-ДПМНЕ, Христијан Мицкоски, на настанот „Саем – Отчет, четири години работа за тебе“ испрати пораки и за претстојните локални избори, истакнувајќи дека партијата ќе победи убедливо и многу општини ќе се решат уште во првиот круг.

Мицкоски подвлече дека секоја победа мора да се заслужи со работа и чесност, нагласувајќи дека кандидатите за градоначалници мора да ги следат вредностите и принципите на партијата, да бидат достапни за граѓаните и да решаваат проблеми на локално ниво.

Тој најави и промени во партијата и владата, со цел поголема динамика и ефективност. „Тоа не значи дека луѓето кои ќе бидат заменети биле лоши или немарни, но на владата ѝ треба подинамичен капацитет, уште посилно темпо за промените кои ги правиме“, рече Мицкоски.

Претседателот на ВМРО-ДПМНЕ потенцираше дека ДУИ ќе остане во опозиција и нема да влезе во владата по локалните избори, додавајќи дека Македонија ќе им каже „не“ на СДСМ и ДУИ, осудувајќи ги како коалициски партнери во корупција и криминал.

Мицкоски истакна и позитивни економски резултати, како зголемен извоз, раст на БДП и оживена економија, додавајќи дека граѓаните наскоро ќе ги почувствуваат овие резултати.