На денешниот Саем-Отчет по повод „4 години работа за тебе“, министерот за транспорт Александар Николовски истакна дека се работи на целосно автопатско поврзување на Битола со Скопје, кое се очекува да биде готово во периодот 2028-2029 година. Според него, овој проект ќе овозможи побрзо и безбедно патување, како и позитивно влијание врз бизнис климата во Битола и регионот.
„Работиме на огромен проект со Јавното претпријатие за државни патишта, целосно автопатско или експресно решение од Скопје до Битола, кое ќе овозможи патување за околу еден час и 30 минути“, рече Николовски.
Тој додаде дека во Штип се реализираат проекти за унапредување на туризмот, вклучително урбанизација на делот на бања Кежовица и изградба на првото вештачко туристичко езеро во регионот. „Се работи на максимално искористување на потенцијалот на Штип за развој на туризмот“, истакна Николовски.
