Црна Хроника

Продолжуваат телефонските измами врз пензионерите – тетовчанка измамена за 2.000 евра

Осумдесет и тригодишна жена од Тетово вчера пријавила во СВР Тетово дека станала жртва на телефонска измама и изгубила 2.000 евра. Според пријавата, на телефон ѝ се јавило непознато лице кое лажно ѝ соопштило дека нејзината ќерка наводно предизвикала сообраќајна несреќа во Скопје со смртни последици. За да „избегне затвор“, од неа побарал итно да предаде пари.

Жената, вознемирена од наводниот настан, ги оставила парите на договорено место, а дека е измамена сфатила подоцна, по разговор со својот зет.

Полицијата презема мерки за целосно расчистување на случајот, кој е уште еден пример за серијата телефонски измами каде жртви најчесто се постари лица. Измамниците најчесто се претставуваат како роднини, лекари или службени лица, користејќи страв и паника за да извлечат пари.

Надлежните апелираат до граѓаните:

Никогаш да не даваат пари по телефонски барања од непознати лица. Секогаш веднаш да ја проверат информацијата со блиските. Да не споделуваат лични и финансиски податоци. Секој сомнителен повик да го пријават на бројот 192 или во најблиската полициска станица.

Црна Хроника

77-годишна скопјанка измамена со 150.000 денари од лажно лице што се претставило како доктор

На 19 декември 2025 година, 77-годишна жена од Скопје пријавила во СВР Скопје дека била измамена за сума од 150.000 денари. Според пријавата, непознато машко лице ѝ се јавило телефонски, претставувајќи се како доктор, и ѝ рекло дека треба да даде пари за операција на нејзината ќерка, која наводно се повредила додека ги шетала кучињата.

Жената парите ги оставила на договореното место, но по разговор со својата ќерка сфатила дека станува збор за измама.

Полицијата презема мерки за расчистување на случајот и за откривање на лицето што ја измамило.

Црна Хроника

Напад со нож – едно лице тешко повредено

Во струшкото село Драслајца, на 19 декември 2025 година, едно лице било нападнато со нож, при што претрпело тешки телесни повреди. Повредениот, И.С. (33) од селото Ложани, бил веднаш пренесен во Општата болница во Струга за укажување на лекарска помош.

На местото на инцидентот извршен е увид од јавен обвинител и полициски екипи, а се преземаат мерки за расчистување на настанот и идентификација на сторителот.

Црна Хроника

Маглата предизвика верижна сообраќајка во Скопје, сообраќајот се одвива отежнато

Попладнево на влезот во Скопје, веднаш по наплатната рампа кај Петровец, се случи верижна сообраќајна несреќа во која учествувале повеќе патнички возила.

Според сведоштва на граѓани објавени на социјалните мрежи, густата магла значително ја намалила видливоста, што довело до отежнато и забавено одвивање на сообраќајот во овој дел од патот. Возачите кои минуваат низ оваа делница апелираат на зголемена претпазливост и прилагодување на брзината на актуелните услови.

Полициски екипи се присутни на терен и вршат увид на местото на несреќата. Повеќе информации за причините и евентуалните последици од сообраќајката се очекуваат по завршување на истрагата.