ВЛЕН обвинува дека во пописот од 2021 година, спроведен од владата предводена од ДУИ, албанската дијаспора била избришана и со тоа, како што велат, била нанесена голема неправда врз Албанците.
„ДУИ е печатот на националниот срам. Тие го напишаа, предложија и изгласаа моделот и методологијата на пописот што ги обезвреди бројките, ја исклучи дијаспората и го наруши правичното претставување на Албанците. Проблемот не дојде случајно, ДУИ го создаде“, соопшти ВЛЕН.
Во реакцијата се наведуваат имињата на Али Ахмети, Бујар Османи, Артан Груби, Илми Селами, Блерим Беџети и други функционери на ДУИ како директни одговорни за усвојувањето на Законот за попис во парламентот.
Според ВЛЕН, цели села во западна Македонија биле попишани со само 30 до 50 проценти од жителите, додека, како што нагласуваат, министрите на ДУИ се грижеле за приватни компании на свои роднини, а не за правичен попис. „Додека тие се богатеа, Албанците беа избришани од пописот“, велат од партијата.
„Не може ДУИ да тврди дека ќе решава проблем што самата го создаде. Времето на манипулации заврши, започна времето на еднакви права“, порачуваат од ВЛЕН, додавајќи дека веќе е започната иницијатива за одговорност на сите вклучени во спроведувањето на, како што го нарекуваат, скандалозниот попис.
