Македонија

Силјановска-Давкова: Потребна е сериозна државна стратегија за медиумите и културата

Претседателката Гордана Силјановска-Давкова во интервју за Јавниот сервис зборуваше за улогата на медиумите и содржините што им ги нудат на гледачите, нагласувајќи дека е неопходна посериозна државна стратегија во оваа област.

„Телевизиите со национални концесии речиси и да не продуцираат сопствени културни, научни или образовни програми. Во таа насока потребен е посериозен пристап,“ истакна Силјановска-Давкова, потсетувајќи на времето кога ваквите програми биле составен дел од секојдневието.

Таа ја коментираше и селекцијата на вестите, при што предложи поинаков редослед. „Зошто да не започнете со вести од културата, потоа спортот, а на крај политиката? Колегите велат дека тоа не поминува, не е конкурентно. Но, зошто да не се обидеме?“ рече претседателката.

Според неа, клучно е да се преиспита кому и зошто се доделуваат медиумските концесии и какви програмски стандарди се поставуваат. „Денес гледаме програми што не образуваат, не воспитуваат, туку често нервираат и поттикнуваат омраза. Тоа не е добро,“ нагласи таа.

Силјановска-Давкова потсети и на улогата на Македонската телевизија во минатото, која, како што рече, била најгледана токму меѓу младите. „Никој, како МТВ, не умееше да ги научи децата на буквите на толку достапен, креативен и занимлив начин. Документарните емисии беа врвни, а вестите – совршени,“ изјави таа.

Во однос на иднината, претседателката смета дека културните содржини мора да ги креираат луѓе кои ја живеат уметноста. „Оние што знаат што е уметност и што се посветени на неа, треба да ја презентираат културата,“ порача Силјановска-Давкова.

Таа нагласи дека највредната инвестиција е токму во културата – во документарни емисии, дијалози, промоција на млади автори. „Парите, знаењето и љубовта вложени во уметноста и културата остануваат трајно добро,“ рече таа.

Претседателката посочи и на сериозноста на говорот на омраза, предупредувајќи дека тој е штетен не само за воспитувањето на младите, туку и за здравјето на општеството во целина. „Во многу држави постојат санкции за говор на омраза. Такви мерки ни се потребни и кај нас,“ додаде таа.

На крајот, Силјановска-Давкова нагласи дека вложувањето во културата е вложување во иднината. „Имаме искуство, талент и историја. Наше е да ја зачуваме и да ја промовираме таа вредност,“ заклучи претседателката.

Македонија

Конгрес на ДУИ: Ахмети со нови барања

Лидерот на ДУИ, Али Ахмети, на Петтиот конгрес на партијата денеска изнесе сет клучни политички барања што, според него, треба да ја гарантираат стабилноста и функционалноста на државата. Во фокусот се избор на Влада со двојно мнозинство, уставни измени поврзани со одлучувањето во Уставниот суд и целосен ветинг на сите јавни функционери во последните три децении, под меѓународен надзор.

Промовирајќи го новиот „Национален договор за напредок“, Ахмети побара воведување на т.н. „извршен Бадентер“, според кој секој иден владин состав ќе мора да ја добие довербата не само од мнозинството пратеници во Собранието, туку и од мнозинството пратеници кои ги претставуваат немнозинските заедници.

Тој истакна дека унитарната држава може да биде стабилна само доколку се темели на доверба и лојалност меѓу сите заедници, нагласувајќи дека двојното мнозинство е механизам што обезбедува инклузивност и политичка рамнотежа.

Во делот на судството, Ахмети предложи законите донесени со Бадентеров принцип во Собранието да не можат да бидат поништени од Уставниот суд без истото двојно мнозинство меѓу уставните судии. Според него, потребни се уставно-правни измени со кои одлуките што ги засегаат правата на немнозинските заедници ќе се носат само со заемна согласност.

Покрај уставните промени, лидерот на ДУИ инсистираше и на темелно „прочистување“ на политичката сцена. Тој побара целосен ветинг за сите носители на јавни функции во изминатите 34 години, вклучувајќи проверка на потеклото на имотот и процесите на приватизација, со јасен меѓународен надзор.

Македонија

Македонските деца сè порано пробуваат цигари и алкохол: Првата цигара на 9 години, алкохол на 13

Резултатите од најновото истражување ЕСПАД 2024, презентирано од Институтот за јавно здравје, покажуваат загрижувачки тренд кај македонските ученици – дел од децата ја запалуваат првата цигара уште на деветгодишна возраст, додека првиот контакт со алкохол најчесто се случува околу 13 години.

Истражувањето било спроведено во 96 средни училишта со повеќе од 2.800 ученици и укажува и на значителен пораст на употребата на електронски цигари. Повеќе од една четвртина од учениците пробале е-цигари, а секој десетти ги користел во изминатиот месец.

Алкохолот останува најраспространета психоактивна супстанца меѓу адолесцентите, при што момчињата почесто пријавуваат рана употреба, интоксикација и тешко епизодно пиење. Речиси третина од учениците првпат консумирале алкохол на 13 години или помлади.

Иако помал обем се регистрира и употреба на седативи без рецепт, канабис и коцкање, овие појави се особено присутни кај машката популација. Надлежните институции предупредуваат дека овие трендови бараат засилени и современи превентивни мерки.

Од Министерството за образование и наука информираат дека училиштата веќе спроведуваат програми за превенција на злоупотреба на психоактивни супстанци, а од оваа учебна година е воведен и изборен предмет за здравствена писменост. Институтот за јавно здравје нагласува дека резултатите од ЕСПАД треба да послужат како основа за подобрување на политиките и заштита на здравјето на младите.

Македонија

АХВ засилено ги контролира детските новогодишни пакетчиња: дел од нив повлечени поради неточни декларации

Во пресрет на новогодишните празници, Агенцијата за храна и ветеринарство (АХВ) спроведе 262 вонредни инспекциски надзори за да ја провери безбедноста на детските новогодишни пакетчиња. Контролите беа извршени во магацини за пакување, маркетите и продавниците кои ги пласираат овие производи.

Поради несовпаѓање на роковите на збирната декларација со поединечните рокови на производите и непотполни декларации, инспекциските служби издадоа 4 решенија за повлекување на пакетчиња од промет. Дополнително, двајца оператори со храна добија наредби за ставање на комплетни збирни декларации на пакетчињата.

Од спроведените 262 инспекциски надзори, не се изречени парични казни и не е поништена ниту една храна како небезбедна. Во споредба со ланската сезона, кога беа утврдени сериозни неправилности како погрешни ознаки, истечен рок на употреба и промени во својствата на производите, годинава се забележани само минимални недоследности кај операторите.

АХВ најавува дека контролните активности ќе продолжат и во наредниот период, особено пред и по новогодишните празници, со цел да се осигура безбедноста на детските пакетчиња.