Националната гарда на САД, која веќе две недели патролира во Вашингтон по наредба на претседателот Доналд Трамп, од неделата навечер почна да носи оружје – пиштоли М17 и пушки М4, потврдија официјални извори. Одлуката следува откако министерот за одбрана Пит Хегсет даде зелено светло гардистите да бидат вооружени, со напомена дека силата може да се користи „само како последно средство“.
Трамп изјави дека неговата „борба против криминалот“ може да се прошири и во други градови под водство на демократите, конкретно споменувајќи ги Чикаго и Балтимор. Лидерот на демократите во Претставничкиот дом, Хаким Џефрис, оцени дека претседателот нема законско право за ваков потег, додека Пентагон призна дека прави рутински планови за можни сценарија.
Гувернерите на Илиноис и Мериленд, Џ.Б. Прикер и Вес Мур, одбија потреба за дополнително воено присуство, потсетувајќи дека статистиката покажува пад на криминалот – во Чикаго стапката на убиства веќе е во опаѓање, а Балтимор бележи најниско ниво на убиства во последните 50 години.
Иако Трамп тврди дека криминалот во Вашингтон е „исчистен“ благодарение на војската, официјалните податоци укажуваат дека трендот на опаѓање започнал и пред воведените мерки.
