Европската Унија годинава се соочува со најразорните шумски пожари од почетокот на официјалното мерење во 2006 година – досега изгореа вкупно 1.028.000 хектари земјиште, површина поголема од Кипар. Претходниот рекорд беше поставен во 2017 година со 998.000 хектари.
Најпогодени се Шпанија и Португалија, кои сочинуваат две третини од уништениот терен. Податоците на Информативниот систем за шумски пожари на ЕУ (EFFIS) покажуваат значително зголемување на бројот и интензитетот на пожарите од 5 до 19 август, што се совпадна со 16-дневниот топлотен бран на Иберискиот Полуостров.
Во споменатиот период, осум лица го загубија животот, а шумските пожари ослободија околу 38 милиони тони CO2 во атмосферата, придонесувајќи за зголемување на јаглеродниот отпечаток во регионот.
