Американски и руски владини претставници тајно разговарале за можни енергетски договори на маргините на мировните преговори одржани претходно овој месец, јави агенцијата Reuters повикувајќи се на пет извори запознаени со темата.
Според информациите, договорите биле предложени од Вашингтон како поттик за Кремљ да се согласи на прекин на воените операции во Украина, а за возврат САД би можеле да разгледаат олеснување на дел од санкциите.
Една од идеите е американската компанија „Exxon Mobil“ повторно да се врати во проектот „Сахалин-1“, од кој се повлече во 2022 година. Дополнително, било дискутирано Русија да купи американска опрема за проектите за течен природен гас, вклучувајќи го „Арктик 2“, кој е под западни санкции. Меѓу опциите била и продажба на руски мразокршачи со нуклеарен погон на САД.
Разговорите се воделе за време на посетата на американскиот претставник Стив Виткоф во Москва, кога се сретнал со рускиот претседател Владимир Путин и со челникот на рускиот инвестициски фонд Кирил Дмитриев. Прашањето било отворено и во Белата куќа, каде што претседателот Доналд Трамп бил информиран за можните договори.
„Овие теми накратко беа дискутирани и на самитот во Алјаска на 15 август,“ потврдил еден од соговорниците. Според него, Белата куќа сакала да објави инвестиционен договор како политичка победа за Трамп.
Иако ниту „Exxon Mobil“, ниту руските енергетски компании „Роснефт“ и „Новатек“ не сакаа да коментираат, експертите предупредуваат дека евентуалните договори би имале значително геополитичко влијание – особено поради обидите на ЕУ да го намали увозот на руски гас до 2027 година.
Во исто време, Трамп се закани со нови санкции и високи царини доколку мировните преговори не донесат резултати. Според аналитичарите, Вашингтон се обидува преку економски инструменти не само да изврши притисок врз Москва, туку и да ја оддалечи од соработката со Кина.
