Јапонскиот град Тоиаке, во регионот Аичи, планира да воведе ограничување за користење паметни телефони на два часа дневно за сите свои 69.000 жители. Предлогот, за кој се смета дека е прв од ваков вид во Јапонија, веќе е доставен до општинскиот совет и се очекува да се разгледува во октомври.
Градоначалникот Масафуми Коки нагласи дека мерката нема да биде задолжителна ниту санкционирана, туку е замислена како препорака за поттикнување на граѓаните да го преиспитаат начинот на кој го користат своето време. Ограничувањето би важело само надвор од работните и училишните обврски, а активностите како гледање видеа за готвење, вежбање или онлајн-настава не би се сметале во двочасовната рамка.
„Не станува збор за ограничување на правата, туку за поттик секое семејство да разговара за времето пред екран,“ изјави градоначалникот, додавајќи дека иако паметните телефони се корисни и неопходни, кај дел од учениците веќе предизвикуваат проблеми, вклучително и отсуство од настава.
