Студентските протести во Нови Сад ескалираа во жестоки судири со полицијата пред Филозофскиот факултет. Синоќа платото пред факултетот беше целосно растерено, а полицијата употреби бибер спреј и пиротехника, при што има повредени граѓани и студенти.
Инцидентот започнал откако истекол рокот што студентите им го дале на полицијата и деканот – да ја напуштат зградата. Деканот, кој претходно ги избркал студентите и ја заклучил институцијата, изјавил дека нивните барања звучеле како ултиматум. Кога преку мегафон од толпата било порано дека полицијата има „10 минути да се повлече“, ситуацијата излегла од контрола.
Очевидци за N1 велат дека пред влезот имало турканици, употреба на бибер спреј и пиротехника, а на терен пристигнала и Брзата помош. Дел од граѓаните биле испрскани со спреј, а најмалку едно лице добило повреда на носот по удар со полициски штит.
Полицијата формирала обрач околу факултетот, со што го спречила пристапот до зградата, а во акцијата се вклучила и Жандармеријата. Од толпата кон нив биле фрлани предмети, додека граѓаните со кренати раце извикувале „срам да ви е“ и „управата надвор“.
Новинарите, кои се наоѓале на лице место, биле предупредени од припадник на Жандармеријата да ги исклучат рефлекторите за снимање, со закана дека ќе бидат уапсени.
Протестите се резултат на незадоволството од управувањето со институцијата, кое студентите го опишуваат како „нетранспарентно и авторитарно“. Повод за ескалацијата беше одлуката на деканот од 26 август – со која студентите беа иселени од факултетот и зградата заклучена, по нивната блокада со барање за смена на управата и поширок академски дијалог.
