Делегацијата на Европската унија во Киев беше сериозно оштетена во рускиот воздушен напад врз украинската престолнина во четвртокот, соопштија претставници на ЕУ.
Еврокомесарката за проширување Марта Кос изјави дека руските напади биле насочени кон цивилни области и ги осуди како „брутални и терористички“. Таа нагласи дека Унијата останува во целосна солидарност со персоналот на делегацијата, нивните семејства и украинскиот народ.
Амбасадорката на ЕУ во Киев, Катарина Матернова, соопшти дека зградата претрпела сериозни оштетувања од ударниот бран по директен напад врз соседна цивилна зграда. „Рускиот ‘мир’ значеше масовен напад со беспилотни летала и балистички ракети, со најмалку десет загинати и триесет повредени“, напиша таа на социјалните мрежи.
Иако неколку катови од објектот на ЕУ биле оштетени, засега нема информации за загинати меѓу вработените.
Ова не е прв пат делегацијата да биде во близина на напад. Во јуни, иранско беспилотно летало „Шахед“ оштети деловна зграда во соседство на дипломатската мисија.
Нападот доаѓа во момент кога министрите за одбрана на ЕУ се состануваат во Копенхаген за да разговараат за поддршката на Украина и мерките за зголемен притисок врз Москва. Високиот дипломат на ЕУ, Каја Калас, оцени дека ракетниот напад е „намерен избор за ескалација“ и порача: „Додека светот бара мир, Русија одговара со ракети. Таа мора да го запре убивањето и да седне на преговарачка маса.“
