Администрацијата на американскиот претседател Доналд Трамп предложи ново правило со кое се ограничува должината на престој во САД за странски студенти и новинари, како дел од построгите мерки во имиграционата политика.
Според предлогот, студентските визи би важеле најмногу четири години, наместо за времетраењето на студиската програма. За странските новинари би важеле 240 дена, со можност за обновување, додека за кинеските новинари ограничувањето би било 90 дена.
Министерството за внатрешна безбедност образложи дека долгите престои претставуваат безбедносен ризик и финансиско оптоварување за американските даночни обврзници.
Сепак, бројките покажуваат дека меѓународните студенти во 2023 година придонеле со над 50 милијарди долари во американската економија, а во академската 2023/24 година во САД студирале повеќе од 1,1 милион студенти – повеќе од која било друга земја. Универзитетите предупредуваат дека новите ограничувања би можеле да ја загрозат нивната финансиска стабилност и да одвратат талентирани студенти од целиот свет.
Предлогот е објавен во официјалниот Федерален регистар, по што следува краток период за јавни коментари пред евентуалното стапување во сила.
