Турскиот министер за надворешни работи, Хакан Фидан, изјави дека Анкара не учествувала на последните состаноци за војната во Украина бидејќи не е директна страна во конфликтот. „Ние сме неутрален посредник и немавме причина да бидеме на маса во Алјаска или Вашингтон“, рече тој во интервју за TGRT Haber.
Фидан изрази надеж за постигнување мир меѓу Русија и Украина, потсетувајќи дека дел од ставовите договорени на преговорите во Истанбул се одразиле и во поновите разговори.
Тој откри дека Москва ги изменила своите барања – од првичната целосна контрола врз четири региони, сега се откажала од тој услов и бара само 25–30 отсто од Донецката област која сè уште не е под нејзина контрола. Според Фидан, губењето на Донецк ќе ја отежни одбраната на Украина во иднина.
Да потсетиме, на 23 јули во Истанбул се одржа трета рунда преговори меѓу двете делегации, кога беше постигнат договор за нови размени на заробеници – и војници и цивили.
