Германија и Франција денеска објавија дека ќе ја зајакнат украинската воздушна одбрана и ќе воведат дополнителни санкции против Русија, како одговор на смртоносните руски воздушни напади врз Киев, при кои загинаа 23 лица, вклучувајќи четворица деца.
„Несомнено е дека Русија не покажала намера да ја прекине својата агресија против Украина“, се наведува во заедничкото соопштение по средбата на германскиот канцелар Фридрих Мерц и францускиот претседател Емануел Макрон.
Двете земји ќе обезбедат дополнителна воздушна одбрана за Украина и размислуваат за поострување на санкциите за да се изврши максимален притисок врз Русија. Дополнително, тие се согласиле Украина да добие сигурносни гаранции за да се спречи повторен напад од Русија во случај на постигнување мир.
Макрон ја нарече Русија „чудовиште пред нашите врати“, што предизвика критики од Москва, но истакна дека неговиот коментар ја одразува реалната загриженост на народите погодени од руската агресија.
