Израелската армија се соочува со криза – намален одзив на резервисти
Израелската армија се соочува со сериозна кадровска криза, откако се зголемува бројот на резервисти кои одбиваат да се јават на повик или едноставно не се појавуваат, известува New York Times.
По повеќе од година и пол непрекинати конфликти и стотици дена во борбени операции, исцрпеноста, разочараноста и семејните обврски земаат данок меѓу војниците. Израел планира нова мобилизација за офанзива во Газа, со повик на дополнителни 60.000 војници и продолжување на ангажманот на 20.000 веќе активни, но не е сигурно колку резервисти ќе се јават.
Во последните месеци, сè повеќе војници го изразуваат отворено незадоволство, повикувајќи се на психичка и физичка исцрпеност, грижа за семејството и губење доверба во целта на конфликтот. Некои единици пријавиле одзив од само 40 до 60 проценти.
Покрај операциите во Газа, Израелските сили се ангажирани и во јужен Либан, во Сирија и на Западниот брег, што дополнително ја оптеретува армијата. Воведени се седумдневни распореди со две недели платен одмор, но тоа не е доволно за решавање на длабоко вкоренетиот проблем.
Кризата доаѓа во критичен момент за премиерот Бенјамин Нетанјаху, кој инсистира на офанзива против Хамас, но се зголемувањето на отпорот меѓу резервистите може сериозно да ја загрози спроведбата на неговите планови.
