Коалицијата ВЛЕН обвини дека Демократската унија за интеграција (ДУИ) и нејзините поддржувачи стојат зад, како што велат, „оркестрирана кампања на лаги и клевети“ против заменик-премиерот Арбен Фетаи.
„Преку лажни профили и валкани методи се обидуваат да го нарушат угледот на Фетаи и да го сопрат процесот на промени кој веќе е неповратен,“ се наведува во нивната реакција.
Од ВЛЕН додаваат дека ваквите напади само ја потврдуваат нивната сила и успехот во „уривањето на плановите на ДУИ и Таравари со кланот Ѓока“.
„ДУИ се плаши од транспарентност и од нашата решеност да го искорениме криминалот, корупцијата и мафијашките врски што повеќе од две децении ја држеа државата во заложништво,“ стои во соопштението.
Коалицијата потенцира дека, за разлика од ДУИ, ниту еден нивен претставник не злоупотребил јавни пари и дека нивното работење е целосно отворено за јавноста.
„Нашето одлучување е независно и ненаметнато, затоа што се потпираме само на довербата на граѓаните, а не на олигарси и нарко-босови,“ додаваат од ВЛЕН.
Тие заклучуваат дека нападите врз Фетаи се доказ за очај и страв од вистината:
„Нека шират клевети преку лажни профили и дигитални платеници – караванот на ВЛЕН продолжува напред, градејќи иднина без ДУИ и без заложници на Ѓока.“
