Под влијание на голема влажна и нестабилна воздушна маса од запад која е поврзана со циклонската активност со центар над Џеновскиот залив, денес попладне (сабота 30 август) како и во текот на ноќта кон утрешниот ден (недела 31 август) времето во нашата Република Македонија ќе биде променливо и нестабилно со повремени поројни врнежи од дожд, грмежи и засилен ветер од југозападен правец (повремено и локално со брзина од над 60 км/час).
Локално пак атмосферските процеси ќе бидат поинтензивни и во форма на невреме проследено со обилен пороен дожд за кратко време кој може да услови локални поројни поплавувања, силен ветер, електрични празнења и со појава на град. Токму поради очекуваното невреме кај нас, апелирам граѓаните да обратат голема внимателност, тоа значи во случај на појава на електрични празнења да не се претстојува на отворен простор и под осамени дрвја. Исто така во случај на појава на силен ветер граѓаните своите автомобили да ги заштитат, а тоа значи да не ги ставаат во близина на дрвјата, особено оние дрвја кои се стари и осамени.
И во Скопје и околината во погоре споменатиот период времето ќе биде променливо облачно и нестабилно со повремен пороен дожд, грмежи и засилен ветер од југозападен правец. Во делови од котлината ќе има услови за појава на невреме, проследено со обилен пороен дожд за кратко време, силен ветер, електрични празнења и со услови за појава на град.
Поради продор на значително посвежа воздушна маса од север, денес (сабота 30 август) во попладневните и во вечерните часови температурите брзо ќе опаднат дури и за повеќе од 10 степени. Токму оваа нагла промена на временската состојба кај нас особено ќе ја почувствуваат метеопатите кај кои се можни поголеми здравствени проблеми. Утре (недела 31 август) температурите ќе се искачуваат во интервалот од 23 до 32 степени, а во Скопскиот регион температурата ќе се искачи до околу 29 степени. Тоа значи дека утре (недела 31 август) денот ќе биде значително посвеж и со повремено засилен ветер од северен правец, најизразен во Повардарието.
