Рускиот претседател Владимир Путин, во писмено интервју за кинеската агенција „Синхуа“, порача дека Москва и Пекинг заеднички се спротивставуваат на „дискриминаторските“ санкции кои, според него, го кочат глобалниот социо-економски развој.
Тој истакна дека двете земји ќе продолжат да ги намалуваат трговските бариери и дека се бележи напредок во економската, трговската и индустриската соработка. „За време на посетата ќе разговараме за нови чекори кои ќе ја интензивираат соработката во интерес на нашите народи“, рече Путин.
Ова е негова прва посета на Пекинг по мај минатата година и доаѓа во услови на забавување на билатералната трговија, додека војната во Украина продолжува и покрај неодамнешниот самит со Доналд Трамп на Алјаска.
Откако Западот ги прекина економските врски со Москва поради инвазијата врз Украина, Кина стана клучен партнер на Русија, купувајќи нафта и пласирајќи производи – од автомобили до електроника. Билатералната трговија достигна рекордни 245 милијарди долари во 2024 година.
Путин и Си Џинпинг во 2022 година го прогласија своето стратешко партнерство за „без ограничувања“, а досега се сретнале повеќе од 40 пати.
