Со свечена церемонија вечерва во Битола беше откриен споменикот на македонскиот војвода Александар Турунџев, поставен кај Ат Пазар – местото каде што загинал пред точно 120 години.
Настанот започна со поворка низ битолските улици, при што граѓаните се собраа пред ОУ „Ѓорги Сугарев“, местото каде Турунџев бил затворен. Македонското знаме го развиорија млади комити од КУД „Илинден“ Битола, а поворката ја предводеше коњаницата „Костурска чета“, придружена од блех музика, групата „Љубојна“ и млади зурлаџии и тапанџии од АФ „Гоце Делчев“.
Градоначалникот на Општина Битола, Тони Коњановски, заедно со потомци од семејството Турунџиеви, пред бројни граѓани и гости го открија споменикот, при што тој истакна дека „Битола ја исправи својата вечна должност и токму на денот на неговата погибија му подари споменик на Александар Турунџев“.
Свеченоста беше збогатена со настап на правнуката на војводата, пејачката Сузана Турунџиева, која ја отпеа македонската химна, како и со изведбата на оперскиот пејач Игор Дурловски и аранжманот на Николче Мицевски на песната „Црно му било пишано“, посветена на Турунџев.
