Градоначалникот на Општина Ресен, Јован Тозиевски, во гостување на „Сител поткаст“ најави интензивни активности за заштита и унапредување на животната средина во преспанскиот регион.
„За чиста Преспа – преку соработка со ЕУ, имплементаторите УНДП, невладините организации и општината започнуваме еден проект за расчистување. Ние детектиравме околу 40 диви депонии каде што првиот повик веќе е објавен за избор на фирма која ќе постапува на тие депонии и понатаму после расчистувањето на теренот, тие места да се оплеменат – дали било со детски паркови, дали со клупи или слично, за да ја подигнеме јавната свест и тие навики за места за фрлање на тој отпад да ги искорениме од населението“, истакна градоначалникот на Општина Ресен. „Понатаму институцијата институционално ќе настапува со мониторирање на просторот“, дополни тој, најавувајќи континуиран надзор по санацијата.
Осврнувајќи се на решението за отпадот на подолг рок, градоначалникот го најави проектот за регионална депонија како најголем за Преспа. „Со селекција на отпадот и транспорт во регионалната депонија, перспективно гледано е иднината на зачувување не само на Преспа, туку и цела држава, а и зачувување на целата животна средина“, објасни тој. „За многу скоро ќе ги видиме и првите чекори и резултати“, истакна оптимистички Тозиевски.
