Со голема свеченост и поворка исполнета со историска симболика, вчера во Битола беше откриен споменикот на македонскиот револуционер и војвода Александар Турунџев.
Градоначалникот на Општина Битола, Тони Коњановски, заедно со потомците на семејството Турунџиеви, во присуство на бројни битолчани и гости, го открија споменикот на војводата токму на денот на неговата погибија, пред 120 години.
На свеченоста ѝ претходеше поворка низ градските улици, која започна пред ОУ „Ѓорги Сугарев“, местото каде Турунџев бил затворен. Македонското знаме го развиорија млади момчиња во комитска носија, членови на КУД „Илинден“, а поворката беше предводена од коњаницата „Костурска чета“. Настанот беше збогатен со настапи на групата „Љубојна“, младите зурлаџии и тапанџии од АФ „Гоце Делчев“, како и блех-оркестар.
Граѓаните масовно се приклучуваа на поворката која минуваше низ Плоштад „Магнолија“, покрај реката Драгор, до Ат Пазар – местото на погибието на Турунџев, сè до новиот кружен тек каде што е поставен споменикот.
Свечениот дел продолжи со изведба на македонската химна од правнуката на војводата, пејачката Сузана Турунџиева, а оперскиот пејач Игор Дурловски, во аранжман на Николче Мицевски, ја отпеа песната посветена на Турунџев – „Црно му било пишано“.
