Со настапот на „Bitola Art Mapping“, спектакл со современа уметност, 3Д мапинг и музика, синоќа свечено беше затворено 17-то издание на Битолското културно лето – „Битфест“.
Во изминатите 70 дена, почнувајќи од 26 јуни, Битола повторно се претвори во центар на културните случувања во државата. Фестивалот понуди богата програма со концерти, театарски претстави, содржини за деца и настани што ја слават македонската традиција и музика.
Меѓу највпечатливите настани беше концертот на светски познатиот диџеј Армин ван Бурен на стадионот „Петар Милошевски“, кој, според организаторите, ќе остане запишан во културната историја на градот.
„Битфест“ и годинава ги негуваше традиционалните манифестации како „Илинденски денови“, „Широк Сокак во бело“, „Битолино“ и „Локум фест“, кои се веќе препознатлив белег на фестивалот.
Особено значење ова издание има и поради тоа што првпат фестивалот доби поддршка од Министерството за култура и туризам во делот на креативните индустрии, што овозможи реализација на завршниот проект „Bitola Art Mapping“.
Општина Битола упати благодарност до Министерството, уметниците, институциите, организаторите и публиката, со пораката дека со секое ново издание градот ја зацврстува позицијата како културно срце на регионот.
