Вицепремиерот и министер за животна средина Изет Меџити, кој е и кандидат за градоначалник на Чаир, соопшти дека група реномирани турски експерти предводена од архитектот Бајрам Вардар ќе работи на изготвување на развојниот Мастер план за општината.
Од тимот се очекува да понуди современ и одржлив концепт за урбан развој, комбинирајќи меѓународно искуство со локални потреби. Меѓу експертите се издвојуваат:
• Надир Доган, урбанист од Универзитетот „Гази“, основач на ND İMAR A.Ş., со искуство во просторно планирање за Истанбул, Бурса, Кожаели и Трабзон;
• Др. Мустафа Тутар, архитект со образование во Истанбул и САД, универзитетски професор и основач на „Saydam Tasarım“, зад кој стојат над 800 меѓународни проекти.
Во тимот ќе учествуваат и други турски и локални урбанисти и архитекти, кои заедно ќе изработат Мастер план со јасна имплементација и визија Чаир да стане пример за одржлив урбан развој во Скопје.
Бајрам Вардар, кој потекнува од Скопје, е познат по својата работа како дел од тимот на Реџеп Таип Ердоган во времето кога тој беше градоначалник на Истанбул, а бил и главен урбанист на градот Бурса.
„Слично како во Истанбул и Бурса, и овде се соочуваме со исти предизвици. Со граѓаните ќе изработиме Мастер план, ќе развиеме столбови на планот и ќе подготвиме концепт за неговата имплементација“, изјави Вардар во заедничкото видео со Меџити.
