Народната банка најави мерки кои ќе ја олеснат купопродажбата на прв стан за граѓаните. Гувернерот Трајко Славески, во интервју за „Радио Слободна Европа“, објасни дека лицата кои купуваат свој прв дом ќе можат да поднесат барање за кредит со значително намалено сопствено учество.
„Целта е да се поддржат граѓаните кои купуваат свој дом, додека кај инвестиционите купувачи учеството ќе се зголеми, за да се намали притисокот врз цените и да се зголеми финансиската одговорност“, појасни Славески.
Тој додаде дека банките ги препознаваат купувачите на прв стан како помал ризик, бидејќи кредитот се користи за сопствено живеалиште. Се очекува подобрување на условите и пониски каматни стапки за оваа категорија.
Гувернерот истакна дека сегашните каматни стапки се релативно ниски во споредба со други пазари и дека со стабилизирањето на инфлацијата под 3%, кредитирањето ќе стане поедноставно и поодржливо. Народната банка ја следи пазарната ситуација за да обезбеди одржлив раст и заштита на интересите на граѓаните и банкарскиот сектор.
