Балкан

Од 1 октомври поскапува струјата во Србија за 6,6 проценти

Електричната енергија за домаќинствата и малите потрошувачи во Србија од 1 октомври ќе поскапи во просек за 6,6 проценти. Дополнителен раст од околу 1,9 проценти ќе имаат оние кои трошат над 1.200 киловат-часови месечно.

На барање на „Електропривреда Србије“ (ЕПС), Советот на Агенцијата за енергетика на Република Србија (АЕРС) даде согласност за новите цени за гарантовано снабдување, кои ќе почнат да важат од 1 октомври 2025 година. Од АЕРС објаснуваат дека зголемувањето е последица на порастот на надоместоците за пристап до преносниот и дистрибутивниот систем.

Претходно, Агенцијата одобри зголемување на цената за пренос за 10 проценти, а за дистрибуција за 16 проценти – прво поскапување по октомври 2021 година.

Истовремено, беше одлучено границата меѓу „плавата“ и „црвената“ зона на потрошувачка да се намали од 1.600 на 1.200 киловат-часови. Тоа значи дека потрошувачите кои ќе ја надминат оваа граница ќе плаќаат двојно поскапа струја за секој киловат-час над 1.200.

Зелената зона останува до 350 kWh, сината е од 350 до 1.200 kWh, а црвената е над 1.200 kWh. Според АЕРС, оваа промена ќе влијае на мал дел од корисниците – околу 1% во летните месеци, 3% во есен и пролет, и до 7% во зимскиот период.

И покрај корекцијата, цената на струјата за гарантовано снабдување во Србија останува една од најниските во Европа, наведува АЕРС.

Српските власти претходно му ветиле на ММФ дека ќе ја зголемат цената на електричната енергија за околу 7% и ќе ја намалат границата за влез во „црвената“ зона.

Од ЕПС дополнително информираат дека од 1 октомври и претприемачите, како и малите и микро компании, ќе можат да склучат договори за гарантовано снабдување со електрична енергија. Со тоа, тие ќе имаат можност да ги намалат трошоците во однос на сегашните и да изберат дали ќе купуваат струја на регулираното или на комерцијалното пазариште.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.