Заклучно со утрово, на територијата на Македонија се регистрирани вкупно 18 пожари на отворен простор, од кои два се активни, три под контрола, а 13 се целосно изгаснати, соопшти Центарот за управување со кризи.
Активни пожари има во општина Долнени, кај селата Црнилиште и Долгаец, каде што гори нискостеблеста вегетација, како и во општина Липково, во атарот на селото Никуштак, каде што зафатена е мешана шума.
Под контрола се пожарите на планината Кожуф во општина Гевгелија, во Повеќенаменското подрачје „Јасен“ во општина Македонски Брод и на депонијата во населбата Вардариште во општина Гази Баба.
Преостанатите 13 пожари, регистрирани во повеќе општини, се изгаснати.
