Русија и Кина потпишаа голем договор за нов гасовод
Руската компанија „Гаспром“ потпиша правно обврзувачки договор за изградба на гасоводот „Сила на Сибир 2“, кој ќе поминува низ Монголија и ќе ја снабдува Кина, како и за проширување на испораките преку две дополнителни маршрути.
Според руските агенции, гасоводот ќе обезбедува дури 50 милијарди кубни метри гас годишно во период од 30 години. Генералниот директор на „Гаспром“, Алексеј Милер, во Пекинг изјави дека цената на горивото ќе биде пониска од онаа што компанијата моментално им ја наплатува на европските потрошувачи.
Со овој договор, „Гаспром“ има цел да ја зајакне својата улога како клучен снабдувач на Кина со природен гас преку гасоводен систем и делумно да ја надомести намалената испорака кон Европа по почетокот на војната во Украина.
Дополнително, компанијата се согласи да го зголеми капацитетот на постојниот гасовод „Сила на Сибир“ за уште 6 милијарди кубни метри годишно, над сегашните 38 милијарди. Планирано е и зголемување на протокот преку идната далекуисточна рута кон Кина, чија изградба треба да започне во 2027 година, над првично предвидените 10 милијарди кубни метри годишно.
