Економија

Сè повеќе компании и суверени фондови инвестираат во BNB – криптовалутата станува „blue-chip“ дигитално средство

Сè повеќе традиционални компании и институции го вклучуваат BNB (криптовалута создадена од Binance, која се вбројува меѓу петте најголеми дигитални средства во светот) во своите трезори, гледајќи го како стабилно и профитабилно дигитално средство. Во последните месеци, биотехнолошката компанија Windtree Therapeutics, производителот на полупроводници и AI решенија Nano Labs, како и BNB Network Company, краен трезор на CEA Industries Inc. објавија дека дел од својата ликвидност ја чуваат токму во BNB.

Особено внимание привлече најновата зделка на BNB Network Company, која купи 200 илјади токени во вредност од околу 160 милиони долари. Интересот не доаѓа само од приватниот сектор. Имено, и Druk Holding & Investments, суверениот фонд на Бутан, го потврди своето портфолио со BNB, што укажува на доверба и на државно ниво.

Причините за ова се јасни. BNB ја покажува својата отпорност, бележејќи најниско намалување на вредноста меѓу водечките алткоини. Во 2025 година никогаш не падна за повеќе од околу 30 проценти од својот историски максимум. Со тоа ги надмина ETH, XRP и SOL и ја зацврсти својата репутација како исклучително стабилно дигитално средство. Дополнително, во изминатите пет години, BNB се истакна со Sharpe ratio од 2,5 – што покажува дека за секој преземен ризик, успеал да донесе 2,5 пати поголем поврат. Овој резултат е подобар од традиционалните берзански индекси и останатите водечки криптовалути.

Но, BNB не е само инструмент за инвестиции. Сè повеќе корпорации ја користат криптовалутата и за оперативни потреби преку Binance Pay, овозможувајќи директни плаќања кон партнери, добавувачи и вработени. Програмите како Staking и Simple Earn, пак, им дозволуваат на компаниите да остваруваат приход дури и додека ја одржуваат ликвидноста.

Како дел од екосистемот на Binance, BNB денес држи над 80% удел во сегментот на размена на токени, нудејќи дополнителни придобивки – од пониски трошоци за тргување и користење за плаќање трансакциски провизии на BNB Chain, до ексклузивен пристап до нови проекти и airdrop програми.

На 28 јули, вредноста на еден BNB достигна повеќе од 861 долар, со пазарна капитализација над 119 милијарди долари – бројка со која токенот надмина глобални корпорации како SoftBank и Nike.

Сето ова покажува дека BNB постепено се позиционира како „blue-chip“ дигитално средство – комбинација од сигурност, високи перформанси и практична употреба, што го прави сè попривлечен избор за корпоративни трезори и национални фондови ширум светот.

Економија

Најбарани професии во ЕУ – продажба, маркетинг и производство

Според податоците на Евростат за минатата година, најголема незадоволена побарувачка за работна сила во Европската унија имало во професиите поврзани со продажба, маркетинг и производство. Ова укажува на можни тешкотии за работодавачите при регрутирање на персонал во овие сектори.

Според експерименталната статистика, составена делумно преку податоци од онлајн огласи за работа, највисоки стапки на слободни работни места биле забележани кај работници во производство и помошни канцелариски работници, со стапка од 7,3% секое. Следуваат други работници во продажба со 6,1% и уметнички, културни и кулинарски соработници со 6%.

Дополнително, околу 5,8% од непополнетите позиции се однесувале на работници во транспорт и магацини, 5,7% на менаџери за малопродажба и големопродажба, 5,4% на агенти за бизнис и услуги, 5,2% на оператори на постројки и машини и 5% на инженерски професионалци, со исклучок на електротехничките профили.

Евростат истакнува дека иако здравствените работници и наставниците, како и други занимања во јавниот сектор, исто така може да се соочат со тешкотии при регрутирање, тие поретко се рекламираат онлајн, па затоа во податоците се рангирани пониско. Од друга страна, ИТ професиите може да бидат претставени со поголема застапеност во онлајн огласите за работа.

Економија

Хрватска ги менува правилата за странски работници – еве колку дозволи има за Македонците

Хрватска воведува нови услови за вработување на странски државјани со цел подобра контрола, намалување на нелојалната конкуренција и спречување на нелегалните практики. Измените на Законот за странци воведуваат построги здравствени критериуми и барање за познавање на хрватскиот јазик, информира ХРТ.

Граѓанин на трета земја, како Македонија, за прва дозвола за привремен престој ќе мора да приложи потврда за здравствена состојба и статус на вакцинација, кои не смеат да бидат постари од 90 дена. Исто така, познавањето на хрватскиот јазик се смета за основа за интеграција на странските работници, а државниот секретар Иван Видиш посочи дека и покрај кофинансираното учење јазици од Европскиот социјален фонд, интересот кај работниците е слаб.

Хрватска годинава издаде над 11.000 работни дозволи за граѓани од Македонија. Премиерот Андреј Пленковиќ истакна дека во последните две години се создадени 100.000 нови работни места, а бројот на невработени паднал на 81.000, што го покажува ефектот од активната политика за вработување.

Министерот за труд Марин Пилетиќ додаде дека во земјата моментално има околу 140.000 странски работници, а измените на законот ќе го намалат бројот на нови дозволи, додека ќе се зголеми значењето на оние кои веќе се наоѓаат во Хрватска.

Претседателот на GSV, Иван Мишетиќ, посочи дека во наредните пет години ќе бидат потребни над 100.000 работници од странство поради планираниот раст и пензионирањата, бидејќи домашниот пазар не може да го задоволи овој раст.

Економија

Од вечерва нова цена на дизелот

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 0,60% во однос на одлуката од 18.12.2025 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,631%, кај дизелот за 4,633%, кај екстра лесното масло за 3,987% и кај мазутот зголемувањето е за 0,223%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,1645%.

Од 20.12.2025 година од 00:01 часот максималните цени на нафтените деривати ќе изнесуваат:

– Моторен бензин ЕУРОСУПЕР БС – 95 71,00 (денари/литар);
– Моторен бензин ЕУРОСУПЕР БС – 98 73,00 (денари/литар);
– Дизел гориво ЕУРОДИЗЕЛ БС (Д-Е V) 64,50 (денари/литар);
– Масло за горење Екстра лесно 1 (ЕЛ-1) 65,50 (денари/литар);
– Мазут М-1 НС 32,635 (денари/килограм).

Малопродажната цена на ЕУРОДИЗЕЛ (Д-Е V) се намалува за 2,00 ден/лит. Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на Екстра лесното масло за домаќинство на (ЕЛ-1) и на Мазутот М-1 НС не се менуваат.