Црна Хроника

Штекли под лупа – Нови детали од судењето на Раде Штекли

На денешното рочиште за случајот „Штекли“, поврзан со организирана продажба на дрога во скопската населба Аеродром, судот ќе разгледува психијатриски вештачења доставени од одбраната и обвинителството за обвинетиот Раде Трајковски-Штекли.

Одбраната тврди дека Трајковски страда од растројство со шизофрени карактеристики, има халуцинации и параноидни идеи и не е способен да ја следи судската постапка. Обвинителството, пак, достави вештачење во кое се наведува дека тој е апсихотичен, но способен да учествува во расправата.

Судијата Илија Трпков најави дека ќе ги повика вештите лица од двете страни за да ги соочи нивните мислења, по што Судот ќе одлучи дали ќе го прифати едното вештачење или ќе наложи ново психијатриско вештачење.

Случајот опфаќа вкупно 10 лица, по речиси едногодишна истрага во која биле применети посебни истражни мерки. Првично биле опфатени 16 лица, од кои седум веќе склучиле спогодби и добиле затворски казни од 3 до 3,5 години.

Обвинителството наведува дека групата била добро организирана, со јасно дефинирани улоги – од набавка до продажба на кокаин и марихуана. Дрогата се чувала во изнајмени станови, а се продавала по цени од 4.500 до 6.000 денари за грам кокаин и 200 до 300 денари за грам марихуана. Комуникацијата се одвивала преку апликацијата Snapchat, а клучни докази биле обезбедени преку „Cellebrite“ системот за анализа на мобилни телефони, донација од САД.

Црна Хроника

Уапсен главен уредник на турска телевизија

Главниот уредник на едниот од највлијателните турски телевизиски канали, „Хабертурк ТВ“, Мехмет Акиф Ерсој, е приведен во Истанбул како дел од проширена истрага за дрога што ги таргетира медиумските и забавните кругови, пренесуваат турските медиуми.

Канцеларијата на главниот јавен обвинител во Истанбул соопшти дека биле издадени налози за апсење на осум лица под сомнение за купување, поседување или употреба на дроги и стимуланси за лична употреба, како и за обезбедување простор за нивна употреба.

Меѓу приведените, покрај Ерсој, е и уредничката за меѓународни вести на „Хабертурк“, Елиф Каланч.

Телевизијата во кратко соопштение потврди дека Ерсој е приведен во рамки на истрагата на истанбулското обвинителство и дека е суспендиран „за да се обезбеди целосна објективност“. Одлуката за неговата суспензија ја донесе државниот Фонд за гаранција на депозити (ТМСФ), кој од септември ја управува матичната компанија на „Хабертурк“ како судски назначен стечаен управник во друга истрага за перење пари.

Овој најнов случај е дел од поширока акција во Истанбул, во која претходно беа приведени и неколку ТВ-водители под сомнение за употреба на дрога, но тие подоцна беа ослободени.

Истрагата привлекува дополнително внимание поради тоа што, за разлика од минатите случаи насочени кон критичарите на претседателот Реџеп Тајип Ердоган, сега под удар се медиумски фигури и деловни структури што се сметаат за блиски до власта, меѓу кои и „Хабертурк“.

Црна Хроника

Пијан мопедист заврши во болница по излетување од пат кај Дојран

Ноќта на регионалниот пат Стар Дојран – Нов Дојран, на потегот „Калдрма“, 22-годишниот Д.Б. од Нов Дојран изгубил контрола врз мопед „Хамачи“ и излетал од коловозот. Во незгодата се здобил со телесни повреди, по што бил пренесен во Општата болница во Гевгелија.

Полициската контрола покажала дека возачот бил под дејство на алкохол – измерени 1,60 промили. За настанот е известен јавен обвинител од ОЈО Гевгелија, а по целосно документирање ќе следи пријава за „безобѕирно управување со моторно возило“ по член 297-а од Кривичниот законик.

Црна Хроника

Опожарен автомобил на паркинг во Скопје

С.Ф. (62) од Скопје пријавил в полиција ноќеска дека на паркинг простор на подрачјето на Бит Пазар било опожарено неговото патничко возило „тојота рав 4“ со скопски регистарски ознаки.

Повредени лица нема, а од екипа на Бригадата за противпожарна заштита Скопје пожарот бил изгаснат.

Извршен бил увид и се преземаат мерки за расчистување на случајот.