Македонија

ВЛЕН: Османи мора да одговори за средбите со Груевски

ВЛЕН обвини дека Бујар Османи одржал средба со бегалецот Никола Груевски, нагласувајќи дека времето, местото и темата на разговорот се добро познати. Според партијата, последните напади кон ВЛЕН и нејзините лидери се „лажни вести и знак на паника“, бидејќи, како што велат, соработката на ДУИ со Груевски и Мијалков требало да остане скриена.

„Реакцијата на ДУИ дека наводно Изет Меџити се сретнал со Вулин е исто толку неточна колку и можноста Артан Груби да биде избришан од црната листа на САД пред локалните избори. Лагите на Бујар Османи не можат да се покријат со нови лаги“, велат од ВЛЕН.

Тие прашуваат зошто всушност се случиле средбите на Османи со Груевски во Будимпешта – дали Османи му ветил враќање во Македонија или пак побарал негова поддршка со ветување дека ќе го симне Али Ахмети од лидерската позиција во ДУИ ако победи во Чаир.

„Бујар Османи не е жртва, туку свесен и активен учесник во овие договори. Тој е човекот кој со години го одржуваше системот на Али Ахмети, како министер во владата на Груевски, овозможувајќи му на него и на Мијалков да ја контролираат државата и да изградат финансиска империја,“ наведува партијата.

Од ВЛЕН порачуваат дека Османи не може да избега од одговорност: „Или ќе го признае својот грев и ќе се повлече од политиката, или засекогаш ќе остане запаметен како фигура што свесно соработувала со најголемите штетници на државата и на Албанците.“

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.