САД донесоа одлука за намалување на програмата за воена помош за армиите на европските земји кои граничат со Русија, објави британскиот Financial Times. Според информациите, Пентагон ги информирал европските дипломати дека повеќе нема да финансира програми за обука и опремување на силите на овие земји, кои би биле на првата линија во случај на конфликт со Москва.
Резовите би можеле да влијаат на програма од 1,6 милијарди долари испратени во Европа од 2018 до 2022 година, при што главни приматели се Естонија, Летонија и Литванија. Претседателот на Естонија, Алар Карис, предупреди дека европските земји треба да се подготват за можноста САД да повлечат дел од своите војници и да започнат да градат свои воени капацитети.
Телефонскиот разговор на Доналд Трамп со европските лидери бил напнат, а Трамп ги обвини Европејците дека со купување руска нафта „помагаат на Русија“. Присутните преговарачи, меѓу кои претседателката на Европската комисија Урсула фон дер Лајен, објаснија дека увозот на руска нафта е значително намален, а само Унгарија и Словачка и понатаму ја увезуваат.
Полска е единствената земја од источниот блок која ја подобри соработката со САД, благодарение на десничарскиот претседател Карол Навроцки, кого Трамп јавно го поддржал. Американскиот претседател најави дека војниците ќе останат во Полска и дека е можно проширување на бројот на трупите и воспоставување на постојана американска база.
Меѓутоа, незадоволството во Европа и кај поддржувачите на Украина расте, додека само една четвртина од Полјаците ја поддржуваат политиката на Трамп кон нивната земја.
