Поддржувачите на турската опозициска Републиканска народна партија (ЦХП) доцна синоќа се судрија со полицијата во Истанбул, откако се обидоа да ги пробијат полициските барикади, јави БТА. Судот претходно го разреши окружното раководство на партијата поради наводни нерегуларности на изборите, пренесе ДПА.
И покрај забраната на властите, демонстрантите протестираа пред окружната канцеларија во Истанбул, каде што денес треба да стапи во функција судски назначеното привремено раководство. Канцеларијата на гувернерот издаде забрана за јавни собири во неколку клучни делови на градот – Бешикташ, Бејоглу, Ејуп Султанахмет, Кадиќој, Саријер и Шишли – со важност до полноќ на 10 септември.
Лидерот на ЦХП, Озгур Озел, повика граѓаните да излезат на улица и да ја „одбранат куќата на Ататурк“. „Срам е што нашата канцеларија е под полициска опсада со специјалци. Судовите се користат за саботажа на нашиот конгрес“, изјави тој.
Од другата страна, младинското крило на владејачката АКП повика на контра-собир, додека министерот за внатрешни работи Али Јерликаја предупреди дека „игнорирањето на судските одлуки е отворен отпор кон законот“ и најави решителни мерки.
Ситуацијата дополнително ескалира по поништувањето на конгресот на ЦХП во Истанбул од октомври 2023 година, што резултираше со отстранување на окружниот претседател Озгур Челик и уште 195 функционери. Судот назначи петчлено привремено раководство.
Протестите се најголеми во Турција по апсењето на градоначалникот на Истанбул, Екрем Имамоглу, во март, кој беше и претседателски кандидат на ЦХП и еден од најсилните ривали на претседателот Реџеп Таип Ердоган. Опозицијата тврди дека сите процеси се политички мотивирани со цел да се уништи нивното влијание по убедливата победа на локалните избори во 2024 година.
