Балкан

Косово ќе инвестира во производство на дронови и милијарда евра за војската

Премиерот во технички мандат, Албин Курти, најави дека во следните четири години ќе бидат издвоени повеќе од една милијарда евра за зајакнување на косовските безбедносни сили (КБС), вклучително и развој на беспилотни летала со ознаката „Made in Kosovo“.

Курти, кој неодамна беше избран од Генералниот совет на Движењето Самоопределување за нов мандатар, истакна дека Косово ќе ја продлабочи соработката со земјите-членки на НАТО, ќе ја стави во функција фабриката за муниција и ќе ја развива домашната воена индустрија.

„За нашата армија во следните четири години ќе издвоиме над една милијарда евра. Ќе развиеме беспилотни летала ‘Made in Kosovo’ и ќе ја унапредиме воената индустрија“, изјави Курти.

Тој најави и формирање на Заедничка воена единица со Оружените сили на Албанија, како и интензивно регрутирање на нови кадри, со цел војската да брои најмалку 1.000 жени и девојки-војници во новиот мандат.

Програмата за сеопфатна одбрана, според него, ќе се спроведува низ целата земја, а секој доброволен резервен војник ќе добие обука и оружје за можни мобилизации.

Балкан

Пијан возач фатен со 200 км/ч

Припадници на Министерството за внатрешни работи на Србија денес околу 14 часот го запреа Д.В. (39) во Лозница, кој управуваше возило „суди“ со брзина од 200,8 километри на час на дел од патот Лозница – Шабац, каде што ограничувањето е 100 км/ч.

Со алкотестирање е утврдено дека возачот бил во тешка алкохолна интоксикација, со 1,41 промили алкохол во крвта.

Возачот веднаш бил исклучен од сообраќај и задржан во службените простории, а против него е поднесена прекршочна пријава за насилно возење и возење под дејство на алкохол.

Балкан

Вучиќ: Србија има гориво до 15 јануари

Српскиот претседател Александар Вучиќ увери дека Србија има обезбедено доволно керозин, мазут, дизел и бензин најмалку до 15 јануари, а можеби и до 25 јануари, обидувајќи се да ги смири граѓаните по информациите за проблеми во нафтената индустрија.

Иако државата веќе 70 дена функционира без увоз на нафта, Вучиќ истакна дека енергетскиот систем е стабилен и дека нема причина за паника пред претстојните празници. Тој сепак призна дека ситуацијата е комплицирана, особено поради статусот на Нафтната Индустрија Србија (НИС), за што Белград следната недела ќе испрати итни барања до американската канцеларија за контрола на странски средства (ОФАК) за добивање оперативна лиценца.

„Доволно керозин, мазут, дизел и бензин обезбедивме најмалку до 15 јануари, можеби и до 25 јануари. Никој не треба да се грижи, имаме безброј технички проблеми, но државата знае како да ги реши“, рече Вучиќ.

Претседателот потенцираше дека Србија нема да дозволи колапс на енергетскиот сектор и им се заблагодари на граѓаните за поддршката. „Ве уверувам дека ќе имате доволно од сè што е потребно за празниците. Ќе добивате навремени информации за секоја промена“, додаде тој.

Балкан

Тешка несреќа на Дурмитор: Турист загина по пад од жичара, жена тешко повредена

Трагичен инцидент се случи денеска на ски-центарот Савин Кук на Дурмитор, кога две лица – странски туристи – паднале од корпа на ски-лифт, при што едно лице го загуби животот, а друго се здоби со тешки повреди.

Несреќата се случила на жичара број два, во стрмниот втор дел од трасата што води кон Савин Кук. Според првичните информации, загинал маж, додека повредената жена е во свесна состојба и комуникативна.

На терен се ангажирани спасувачки и надлежни служби, кои вршат увид и ја утврдуваат причината за инцидентот. Првичните сознанија укажуваат на можен технички дефект во вториот дел од жичарата, по што корпата во која се наоѓале туристите започнала да се движи наназад.