Ерин Патерсон од Австралија е осудена на доживотен затвор за убиството на тројца роднини на нејзиниот сопруг, откако им послужила оброк со отровни печурки. Пресудата ја изрече Врховниот суд на австралиската држава Викторија, објави агенцијата дпа.
Судијата Кристофер Бил ја осуди Патерсон на доживотен затвор без можност за условна слобода во период од најмалку 33 години. Во образложението, тој нагласи дека труењето било испланирано и претставува „огромно кршење на довербата“.
Поротата уште во јули ја прогласи Патерсон за виновна за три убиства и обид за убиство поврзани со настанот од јули 2023 година. Таа тврдела дека смртните случаи биле несреќен случај, но судот го отфрли тоа како неосновано.
Патерсон (50) беше осудена за смртта на нејзините свекори Гејл и Доналд Патерсон, како и на сестрата на Гејл, Хедер Вилкинсон. Таа е прогласена за виновна и за обид за убиство на сопругот на Хедер, Иан Вилкинсон, кој бил во критична состојба, но успеал да се опорави.
Судијата Бил изјави дека делото припаѓа во „најтешката категорија злосторства“ и дека максималната казна е единствено соодветна за сторените дела.
